Woman Have Heavy Load Poem by Erika Heslop Martin

Woman a noh heavy load,
Woman have heavy load.
Dem can never seh dem bored.
Work load, man load, 'woman a badmind dem' load,
Pickney load, bills fi pay load, house fi clean load, hair fi do load,
Washing clothes load an food fi cook load.

Dem seh woman a heavy load wen Satday mawning com,
But a no soh, woman have heavy load Sunday to Satday.
Woman have heavy load,
Stress out fi mad dem load.
But some woman strong an can manage di load.
Hundred poun load pon dem head an ten poun load pon dem yeye top,
Load heavy like led.
Han a batta bruise an back a bruck.

Woman have heavy load,
Soh if yuh bawn a woman,
Be prepared to carry a heavy load.
A jus soh it goh.
Unless yuh call pon Massa Jesus an beg him fi carry it fi yuh.
Woman have heavy load, heavy heavy load.