Untitled Poem Of My Broken Heart Poem by Jessie Ilagan

Magmula noong ikaw ay lumisan
Puso ko ay lubhang nasugatan
Ngunit 'di naisip na ikaw ay palitan
Pagkat kirot sa puso'y 'di kayang ibsan

Sa bawat pagpintig ng orasan
Nananariwa ating nakaraan
Pilitin man ikaw ay kalimutan
Lagi pa rin sa puso at isipan

Matang 'sing ningning ng panggabing tala
Ngayo'y bumabalong ang sanlaksang luha
'Di matanggap ang iyong pagkawala
Dahil hanggang ngayo'y mahal pa rin kita

Apoy sa aking dibdib, poot sa aking puso
Kay tagal nang panahon, di pa naglalaho
Galit at pag-ibig sa puso ko'y naghalo
Nasusuklam pa rin sa huwad mong pagsuyo

Mga sakit at pait ng kahapon
'Di napaghilom ng lumikwad na panahon
Wagas kong pag-ibig na walang katugon
'Sing lalim ng balon, 'sing lakas ng alon


Written when I was in 3rd year college(2005)