Tagleey Na Puso Poem by Ferdinand L Quintos

Maawang a petek ko’n tawen
bengat-bengat la’n linmiwawa,
baybay angga ed abalaten,
nen saray bitewen linmesa.

Say kirlap da so manlangalang,
abainga’y briliante’n mabli,
pamagit ed saray segsegang,
mangiter na liket ed labi.

Balet siak dia ed saya’n bekta
binalkot na erme’y isip ko,
say puso’k nilener ed paga,
na sakey falso’n panangaro.

Onsabi ni dakel ya labi
kaulop da ira’y bitewen,
wala met ni kasi kabuasan
ya say arom siak so abeten?