Lazzat E Aish Agarche Mujhe Maaluum Nahi Poem by Shamim Hashimi

Lizzat e aish agarche mujhe maaluum nahi
Lizzat e dard e jigar say to mai mahroom nahi

Aap ka shayva faqat mere gunaahon ka shumaar
Mai gunahgaar sahi, aap bhi maasuum nahi

Na sahi meri wafa ka kahi charcha lekin
Aap ki deeda dilayri ki kahan dhuum nahi

Haath malne ke siwa aur na kuchh haath aaya
Waqt ki qadr jahaan me jisay maaluum nahi

Raaz afshaa huwa jata hai teri ujlat se
Dil e baytaab thahar, itna abhi jhoom nahi

us taraf saikdon talwaar, idhar ek “Shamim”
Fatah ka jashn kidhar hoga ye maaluum nahi.