Kuhlwa Ngomnyama Poem by Goodenough Sakhile Dlamini

Ngidwanguz’ebumnyameni nje kangithandi
Ngizisondeza ngobubi bomhlaba nje anginani
Ngibona kuyimibalabala ekhangangayo ngokukhazimula
Kancane kancane ngiyaziqhelisa kumdala,
Umzuzu nomzuzu ungilethela izinsizi zomhlaba
Ngibona luvindi kude le ezintabeni, kunqundeka amehlo
Izinkungu ezimhloshana phezu kwamagquma
Kunemizwilili esho ngokunensa nokufudumeza igazi
Ingenza ngikhumbule, ngigcina sengikhuluma ngedwa
Konje ngingubani?
Isho kuzo belo izintaba ngokulandelana
Kuze kunanele imifula nemifudlana

Ngikhalisa okwephuphu nje kangithandi
Ngizibona ngehlukile kepha angiyiboni indlela
Babethi Indlela ibuzwa kwabaphambili
Kepha bonke abaphambili bakude kude nami
Angiboni ngisho imilobo nandlela ngathi sekade badlula
Ngilibona ithemba lihlakazeka liba izinhlasi zosizi
Nkulunkulu wami ngisakwazi ukuthi ungumsizi
Kepha ngihlushwa ukukukhumbula ngezinsizi
Ngizizwa nginokwethuka, sebahlangana phezulu kepha phansi bangamahele
Ngokwehlulela nje ngabe sonke singobani...
Ngabe ngithi ilelo nalelo nkankane aliyodla imisundu yangakubo
Kepha manje, kulomhlabathi sabekwa kumdali sonke singabokudabuka
kanti sizozikhumbula kanjani ukuthi singobani?
Yebo Isilo siyawafinyeza amazipho
Ukuze sihlale singaz’iyozala nkomoni

Kepha nkulunkulu wami ngicela unginike uthando lokukthanda, ungisondeze nabakithi
Ngokudikibala engathi sesiluthezile olunenkume
Nanamhlanje ngisawakhumbula amazwi enkosi uShaka
“Njengoba nibulala mina nje engeke nisalibusa, liyobuswa zinkonjane”
Ukuphila kwethu sekwaba ngukushabalala kwethu njengo Nyazi
Shembe uyibhekile indlu emnyama, ngokuphazima kweso ungu Nyazi
Kepha thina sizincisha ukuphila ngokuphila okungekuphila okwasemhlabeni
Nkosi sicela usiphe ukuphila, sthol’ empilo
Ngyavuma siziqhelisile namasiko nobuthina
Siyintsha siziphilisa okusha kepha asisazi siqhamukaphi
Ukungazi usukaphi, kwenza ungazi uyaphi

Sibulalana sodwa nje kasithandi
Senziwa ukungayazi imvelaphi nesiphethu sethu
Impela, izambane elilodwa liyawabolisa wonke enqolobaneni.
Kubukeka sengathi intendele ibindwe isidwa,
Konke ubukhazikhazi buhamba nezinqinamba
Isono kuye kuthiwe sibi uma usenza usazi
Kepha ngokwesiZulu lixhoshwa libhekile
Nakhona ke kuyabamnyama sibhekile