Indiferentizem Ekstrem Poem by skender iljaz braka

Indiferentizem ekstrem….

Ngadalë shkojnë makinat me emblemën "kfor".
Makina të gjelbërta me ushtarë të gjelbër,
që armët e frikëshme shtrëngojnë në duar.
Prej fytyrave tona indiferente,
të habitur ndihen çuditërisht,
Në mimikat e tyre lexoj ngatërrimi
me një destinacion tjetër.
Vetëm një dridhje qerpiku flet me mua miqësisht
si përgënjeshtrim i harruar, i fjetur
dhe ditët e njollosura me gjak, pas kanë mbetur
nën duartrokitjen e një llozheje të vetmuar.
Nën qetësinë e ditës vështroj një ushtar,
Fëmija përpara ushtarit bënë veç 'pau, pau'
pa e prishur prej syrit të vogël shikimin.
Në rrugë ngadalë shkojnë makinat me emblemën "kfor".
Në rrugë shkojnë ngadalë,
sikur të vinin prej ndonjë planeti tjetër.