Bansag-Angkan Sa Marikina Poem by Pacific Hernandez

Ang Marikina ay natatangi’t iba
Sa maraming bagay kami ay kilala
Di lang sa sapatos, ugaling maganda
Sa ibang larangan, kami’y nangunguna

Dito’y mapapansin mo at mapupuna
Na mayroong bansag ang mga pamilya
Ang isang pamilia pag ipinagtanong
Maaaring sila ay hindi matunton
Sabihin mo man ang nila’y hanapbuhay
Ang napagtanungan, wala pa ring alam
Apelyido nila, iyo mang banggitin
Maaring malabo’t walang linaw pa rin
Pero banggitin mo ang kanilang bansag
Sila’y makikitang mabilis at tiyak
Sa madaling sabi’y may mga pamilyang
Mas nakikilala sa bansag ng angkan
Kesa sa apelyido’t kanilang pangalan

Dito sa Marikina ngayon ay uso pa
Ang bansag sa angkan meron palagi na
Ang ilan sa bansag-angkan kong narinig
Ay angkan ng Buwaya, Bangus, Biglao, Patis
Meron pang Bayawak, Bukol at Kamatis

Sa mga huli at ngayong henrasyon
Ay may pagtataka kung bakit ba gano’n
Paanong ang mga angkan ba’y tinawag
At nangagkaroon ng ganoong bansag
Sa saling-lahi ay nagpalipat-lipat
Sa mga ninuno, kanino nag-ugat

Isang kaugalian na luma bagaman
Sa Marikina ay bahagi ng buhay
Nakatutuwa at magandang tradisyon
Na di mabubura maging ng panahon