Ambuya Dembo Poem by Reginald Ruwende

Manja kwamuri Masibanda
Shumba yakabara shumba yekwa Chirumhanzi
Poto-njere yaibika zvisina kana chipomera
Chapupuri chakavhunga nyika nanhasi takasenga nhoroondo
Chitubu chisina kuzombopwa nanhasi pachiri tinongonwa
Manja kwamuri Masibanda,
Manja kwamuri Ambuya Dembo

Zvamakamuti Tazvivinga maiziva here akanga azvivinga
Zvekuzotivaraidza, kutitandadza nekudakadza moyo yedu
Zvaakanzi Gwaendepi maiziva here muchazozvibvunza kuti aendepi
Arwuvamba rwake rwendo,
Avamba humhare hwekutinya marimba
Zvamakanzi Pasipanodya pasi raiziva haro richazomudya
Manja kwamuri Masibanda,
Manja kwamuri Ambuya Dembo

Uri upi muchato usina kutambwa 'Chitekete'
Kuri kupi kwakanga kusingarire 'Chitekete'
Kusvika kumadokero kwava nenzvimbo 'Chitekete'
Mumichovha yese yaingorira 'Chitekete'
Pasi rese rakateya nzeve yakarira 'Chitekete'
Nanhasi uno inongorira 'Chitekete'
Yaizorira here 'Chitekete'?
Dai musiri imi Ambuya Dembo

Ari ani aive nezwi sera Dembo
Ari ani aitudza gatare sa Dembo
Ari ani akanga asingamuzive Dembo
Nanhasi tinongodemba kuti dai aripo Dembo
Taizomuziva here Dembo, pasina imi Ambuya Dembo
Haiwa, tinoti manja kwamuri Ambuya Dembo

Tinoti rugare kwamuri Ambuya Dembo
Yenyu ndima makarova, zvedi penyu makapedza
Rava redu jana isu vana nevazukuru venyu
Sekuraira kwemushakabvu kuti endai kumusha munoona nhamo dzinonetsa Amai
Hezvo nhasi tiri pano, nehuwandu hwedu takurangarirai
Kunyangwe zvedu takamboti zii zii kwemakore
Tinokumbira kurarama kwenyu, muwedzerwe mazhinji ekurarama makore
Rerugare rwenyu gore risambofe rakasvodza mvura
Rufaro kwamuri Masibanda,
Manja kwamuri Ambuya Dembo