थुलुंगा Poem by Prasenjit Mochahary

गावदां फुरनिमा अखाफोरबादि
जोंखोल जरासे मेगना
मा नागिरनायनि इसारा होयो
दिनैबो आंदि बुजिमोनाखै

मुलुगा आदर्श होनना होसोयोब्लाबो
मुलुगाव गोसारलांनाय उबांखौ थांखिना
गावनो गाव सिमानथ' जानांसिगोन
खुसियाव जेब्लाबो नोंखौ लोहाबहोनो
गोरबो बुंजासे अननाइ लैथो
थारैनो आंहादि गैजारोङा

निखावरि सासे बिबाइयारि एबा
सोरनिबा देरहासार अन्जालुनि
गुन-रोंगौथि गैजायाब्लासिनो,
गुदुं-गुसु मोजाङै मिथिया-हसिया
गुमुर मोनै गुबुन दरसे बियाबाव हांखुरै
मिजिंनि आलायअर'न होसोनायबादि
नोंनि खाथियाव सथबना
खेनदासे अननाइ सादिनाया
बै ईदेन गारदेनाव बादा होनाय
जारौ फिथायखौ जाखुमानायबादि
आंहादि बेसेबा गेदेर गोरोन्थि जाबाय

बेनिफ्राय आबुङै उदां मोननो
जोनोमनि गासै जिउ मोनसेयाव
खैफोदगोनां खोमसि जोमैनि
आंनि हान्थिनाय जिउ अख्राङाव
जोबनाय गैयै मिजिंजों
नागिरनांसिगोन सोरांनि नक्षत्र

नों गावनो मोजाङै मिथिगौ
सुबुंनि गोरबो बिलिरनो हानाय रैसुमै खबामगोनां
मुलुग सानस्रिनि दोंसे खन्थाइखौ
गिलु-बालु मोजां मोननायबादि
गोथार गोरबोजों नोंखौ हास्थायनायानो
आंनि बेसेबा गेदेर लोरबांथि

आंनि इयुन मिजिंनि सोरां नक्षत्रआनो
थोजासे गोथार अननाइ आरो सुबुरुन
बेनो थांना थानायनि गेदेर थुलुंगा
बेयावनो सुबुङा नागिरनाय
जिउनि नंगुबै ओंथि दिनथिनो
थांनानै थागोन आं जुगे जुगे।