The Passioun Of Christ: 11 - Poem by Walter Kennedy

THE RESSURECTIOUN.
This blissit Prince baid giffand conforting
To þe fathiris, quhilk in the lymbe þat lay,
Quhill setterday had rungin at ewinnyng,
And of þe sonday neir comyn wes þe day.
Than be þam led out of þe lymbe away
To parradice with gret solempnite,
His nobill corps to ryiss syne bownit [he].
With multitude he come of angellis sange
And raissit vp the tempill of Salomoun,
Quhilk þe Jowis on gude friday doun thrang,
The cruell ded and pane of his passioun,
As he befor had said in his sarmone:
Ȝe sall þe tempill sla of my body,
And I it sall raiss [vp] in dais thre.
With þat þe graif closit wes wounder fast,
This nobill knycht throw his angelite
On pasche day raiss, and so of þe graif out past
Richt glorius with nobill wictory.
[Till] his moder þan first apperit he,
As ressoun wes, for gif scho for his ded
[Was] maist in pane, scho suld haue first remeid.
This hevinly queyne for hir sueit sonis dede
Remanit still in lamentacioun.
Hir Jhesu for all wofull [panis] remeid
Come for to gif hir consolacioun;
Till hir he maid his salutacioun,
Sayand: Haill! haill! berar of the King,
Quhilk hevin and erd hes into gouernyng.
Off Jhesus hevinly voce full blith scho wes,
Thairfor on kne scho knellit reuerandly,
And halsit him, syne till him couth scho pass,
And he hir met with gret humilite;
In hir armes scho braissit his body
In sic fer[u]our, quhill all þe dule and wa,
Quhilk for his ded scho sufferit, fled hir fra.
Syne in þis place togidder sat þai doun,
Off hevinly talk makand a riall pace,
Quhen he hir schew þat his body [wes] soun,
Boith [handis] and feit, his body and his face,
2
Quhilk crewell men had all changit throw pane
Rycht gloriusly remanit [h]all agane.
Efter this þan schew our Saluiour
To his moder, how Mary Magdalyn
Had bene and soucht him at þe sepultur,
And fand him nocht, and had þe angellis sene.
As wofull wicht, [he] said, weipand hir ene,
About þe graif scho wanderis to and fro;
To confor[t] hir thairfor wald I go.


APPERACIO DM AD MARIAM MAGDALENAM.
Seikand hir lord so lang scho persewerit,
Plungit for him in gret perplexite,
Quhill [atte last] þat he till hir apperit,
Als said, [þis] woman to greit: Quhat alis the?
Scho estimeit, þat gardener bene had he,
Thairfor scho said: Gif þou him tuke away,
The place me schaw, þat I returne hy[m] may.
Hir gret dollour na mar prolong wald he,
Thairfor on hir he callit be hir name.
Scho ansuerit: Rabone, [is it þe]?
That is maister, for quhom wes all her mane.
Scho went, þat Jowis away his corps had tane,
Thairfor wanderand about þe sepultour
With cairfull mynd scho soucht our Saluiour.
That hevinlie [voce] refrenit so hir spreit,
That to þe erd richt law scho lowtit doun,
With fervent hert pressit to brace his feit,
Off hir synnis quhair scho gat remissioun,
Quhen scho þame wesche, or he tholit passioun.
Bot him to nech he forbad, [and] pretend,
Till his fader he had [nocht yet] ascend.


THE THRID APPERACIOUN TO ÞE THRE MARYIS.
Quhen thir thre Maryis to the ciete went,
Into the way to thame apperit he,
And halsit þame; syne said incontinent:
Ga byid my brethir pas in Galalie,
As I haue þame said, þair þai sall me see.
Than on thair kneis þai fell with deuocioun,
Braissit his feit, þan fur þai to þe toun.
This Magdaleyn and hir followi[r]s twa
To þame rehersit, how þai thair Lord had sene.
Fra þat herd Peter, he baid nocht leif to ta
At his brethir, na ȝit þe Magdelyn;
Bot to þe graif, quhair þe Mary[i]s had bene,
He went in haist to find þat nobill duke,
[Quham] he for dredour in his passioun forsuke.


THE FOURT APPERACIOUN TO SANCT PETER.
As Peter passit to þe sepultur,
Him for to seik with mynd and will present,
As doctouris sayis, Jhesus our Saluiour
Than in the way till Peter him present,
All confort him and bad him be deligent;
His brethir all conferme into þe fay,
Ffor of his ded þe pane wes past away.


THE FIFT TO SANCT JAMES.
To Sanct James last apperit he,
Quhilk wowit had þat he suld eit na breid
Fra Thurisday, fra he hard he suld de,
Quhill he him saw agane riss fra ded.
Than Crist till him apperit in þat steid,
Quhair he fastit and bad, a burd be set,
Als breid he put, þat his brethir mycht eit.