Siyephi Kanti Isazela? Poem by Anele Potelwa (Unpublished)

Kunxunguphalo lolonwabo kulentlalo,
koko ukuswela uthando lwantlandlolo,
kutsho kugqekreze nosathana kulenzala,
nditsho ububi obenzeka kulendlala,
ndlala yobomi!
ndlala yolonwabo!
kunqaba uvelwano kuyo imiphango,
kutsho kunqabe isazela kwabangenalo ubango,

nantso imveku ixhaphaza loo ngondekazi,
ngokungazi yoxutha ityasi yalomlondekazi,
ikhamnkqe intliziyo xa ndibona lo mlembelele,
aph'imali yexhewukazi idliwa ngeso kulentlekele
lishiyeke lisopha iinyembezi ixhegwazana,
kungengcinga amandla awekho kulomehlwana,
ndiye ndibuza mna ukuba siyephi isazela?

sibhongobhiyane sendoda eyaziwa ngelikatata,
kulusana yena ubona inkosikazi anokuyithatha,
ikratshi kuye lingumnqa ongenamkhondo,
umntwana osele emncinane ngumfazi wakhe wephondo,
ichiz'iinyembezi intokazi yakuba icinga ngekamva,
ngesinyanzeliso sabazali kube nzima ukubuya mva,

Ndidlwengula nolubomvu usana lumsulwa,
ndoyisakele kumlisela koko kunzima ukulwa,
luselutsha alwazi nto
alwazi bani
lwatshona phi uvelwao?
sabheka phi na isazela?
sele sibhuqeka nje