Massa Blessings Poem by Rustiq Joy

You say blessings a run me down,
Me say me a tan up.
So weh it deh?
It a tek long fi ketch up.
It a tek too long fi ketch up.
Massa Blessings a weh you deh so long?

Me a look lef, mi a look right,
Mi a look down a grung.
Mi even a look up in a di sky,
Tinking you coulda micase come
And lif mi outta dis a crosses ya mi go
Drop miself inna
Beg you God sen im com.

Mi deh a wuk
Two year now.
Mi get wah likkle promotion.
Dem say dem did waa
Cut cos so mi cut cos
But me get cut.
Minno understand.
A wah dis Father?

So mi see a ting
Roun a street corner
Look sweet an ting
Bat mi yeye two time
An im ketch on
Tings a guan good for awhile
Den the belly come,
An di dutty tinking brute run.
An unno keep asking mi why?
How unno keep man an no
Gi dem nutten?

Mi get wah dauta
Tank God she no look like ar fada.
But mi no hav no job.
So mi deh pon street corner
A hol a meds. One day
Woman pass, seh she a com
Pray fi mi.
Seh mi need fi
Get my heart right wid God
'Align his will to mine'.
So mi pree the whole thing
An mi tek it in,
An low ar fi pray for mi.

Soon a clock
Ataclaps tek mi.
Baby father tun Christian.
An wah back di pickney
A wah do im Father?
Im nah tek me back,
Im nah get no pickney.
But im a walk roun di area
Wid pretty ere gal an a praise
God togeda. Dem lucky.


Try mi dida try fi get im back
Mi en up wid anoda pickney.
Fi im fada is the devil imself.
Mi had to ghe the first babyfada
Dem pickney less me would a liv
In a squalor.
But Massa God mi can't lie
It burn me in a mi soul when
Mi see dem togeda.

One morning mi see di gyal
Ring pon finger, face fat and rosy
Cau pregnant she pregnant fi im now.
Well mi couldn't tek it no more
So mi fling stone affa ar
An she drop a grung.
Some ediat boy had to see mi
A fling stone, dem come hold me.
Weh fimi blessings fada
She live, di baby live
An years after mi com see dem
Still a walk hand in hand a praise
God togeda.

Mi hav a likkle job mi a hol onto
Pickney dem a grow strong dispite the meagre food put pon fire.
It's three pickney mi have although it seem like two
Cause the first one is not wid mi.
Still mi affa ask again Lord
Weh fimi blessings deh?
Weh fimi house?
Weh fimi cyar like fidem own deh?
Weh fimi ring pon finger?
Deh a church an nutten
Nah gwan fimi.
You seh blessings a run mi down.
See ya, mi a tan up.
So weh it deh?
Massa Blessings you a tek too long.