Insaan Mar Gaya Poem by Shambhu Dan Mehru

In dharti ke tukdon se
insaan ki kimat bahut badi hai
yeh mat kaho ki
sarhd par insaan mar gaya
yeh to
dharti ki kala aur nirmaan mar gaya
deh ka mol kiye baithe ho
ruh ki kimat bahut badi hai
in dharti ke......
kathor pasliyon ke pinjre me
bhavuk ek narm sa dil hai
aaj nahein sadiyon se issme
sukh-dukh ki sarita bahti hai
aur ye hai usski aankh
aankh nahein sachcha dil hai
jo kabhi dard se bhar aati hai
aur kabhi pyar se hans jati hai
in baaton ka toul kaha hai
zazbaat ki kimat aur badi hai
in dharti ke tukdo se......
jab sann 14 me insaan mar gaya
saari dharti ne chhati peeti
sar takraya aur baar -baar
yehi dohraaya
are, kise marwaate ho?
yeh to mera malik hai
issake paanv rahe mere seene par
issake haath rahe mere youvan par
isane mujhko roop diya
yeh bhogega
issake jeene se mera youvan jeeta hai
nahein khoon ki
mein to issake hoto ki pyaasi
mahz jeet nahein
pyar ki kimat bahut badi hai
in dharti ke tukdon se......
suno:
insaan tumhe kahati hu
abhi azaad kaha ho tum
naye waqt me naye tumhare
malik honge
fir naye shabdon me
maut tumhari mandarayegi
kisi maut ki nahein
har umr ki kimat
bahut badi hai
in dharti ke tukdon se
insaan ki kimat bahut badi hai.