Exactly in this time(ঠিক এইখিনি সময়তে) Poem by Bhaskar Rabha

ঠিক এইখিনি সময়তে
2-4-2000

এজাক বৰষুণৰ অপেক্ষাত
চিঞৰি উঠা শুকান পাতবোৰ

ঠিক এইখিনি সময়তে
ফাচীৰ ৰচি লৈ বগাইছিল আকাশ

হালধীয়া এক আৰ্চীত
আচুৰিছিল দীঘলীয়া চুলি

বেঙবোৰে বেঙা মেলি চাওঁতে ভাঁজ-কেঁকুৰি
নিগনিবোৰে কুটোতে ডাৱৰৰ স্তম্ভ

ডিঙিত হৈছিল বিষ
দাঁতত বিৰিঙিছিল তেজ

পাতবোৰে বেজাৰতে মৰমৰীয়া হৈ
মুখ ঢাকুৰিছিল শিলত

ঠিক এইখিনি সময়তে

দেহৰ তেজবোৰ গোট মাৰি শিল হ'ল
যিখিনি সময়ত ।।
(২০০০ চনত ৰামধেনু নামৰ স্মৃতিগ্ৰন্থত মঞ্জুবালা ছদ্মনামত প্ৰকাশিত)