**ang Busay Sa Tampilisan Poem by HAZEL Calumarde

nipanaw ako'g miadto sa layong dapit
haron pangitaon ko ikaw, naabot akong pangita
didto sa tumoy sa bangaw ug ni anino mo
wala ko nahibalag, gituyok ko na ang
tibuok kalasangan ug nalili ko na ang
tanang kabugangan, apan ni sinyal
sa imong gininhawa ug tunob
sa imong mga lakang wala ko kini
igkita,

maong nilingkod nalang ako
niadtong usa ka busay ug nagpalabay
sa pipila ka mga gutlo, giatubang
ang haguros nga bugnawng hangin
duyog sa kakusog sa agay sa bul-og
sa akong mga luha-nakiglumba
sa busay nga nakigharong kanako

miduko ako, mipiyong sa makadali
ang akong mga mata, akong gihinay
pagpukaw ang akong galamhan
nga ning sayong kabuntagon
nagdamgong ania ka sa kong atubangan,
buhi ug anaa nianang busay sa Tampilisan.