Xola Nhliziyo Yami Poem by SIYETHEMBA THWALA

Xola nhliziyo yami

Nhlung' ezibuhlungu
Siz' olukhulu
Kuqaqamba kwezulu
Micabang' enzulu
Kubalis' okuyisisulu
Samazw' antshontshothayo
Ehlal' enhlizweni

Xola nhliziyo yami
Usehambil' obumthanda
Sebemthathil' abanemali
Usemukil' othandiweyo wami
Kwashabalal' uthand' ebelunamandla
Kwasal' izimbob' ezinechashaza
Ngaye gez' izandla
Yize kunzima bandla

Othandiweyo wami
Usagcwel' amathafa
Unqamul' izintaba nemimango
Ngenxa yawo wonk' umbango
Uthando lwashabalala
Izinyembezi zadl' izindwani
Zidl' imilala nemihosha

Xola nhliziyo yami
Sebemthathil' abahlakaniphile
Sebendlule nay' abaziyo
Bangishiya ngikhal' ezimathonsi
Kuhle kwezinyosi zithathelw' udosi
Sebengishaye ngestin' abaphusile
Ub' esevalek' amehl' umuntu wami

Inhliziy' igobhoz' igazi
Izam' ukuval' izibazi
Ezingasoze zesuka
Uzogcina ngokuzibuka
Yen' usekhale wemuka
Yize kungelul' ukubuya
Utshani bumil' imbuya

Xola nhliziyo yami
Akasekh' emehlweni wakho
Izinhlungu zigcwel' emthambeni wakho
Ukuhlangana kwezinyembezi
Kanye nemicabango
Sekufana nenhlese
Uzwe nezwi lakhe
Lithi ncese

Sebengimukuze ngestini
Kuthonono wami
Akusekh' ukuphela yinsini
Phakathi kwethu
Ngiyakuzwela mfowethu
Akukho soka ladla kahle
Imbang' ikhala

Ngokungephuc' iqath' emlonyeni
Ungehlwith' inyon' esandleni
Kwehl' unyembez' ebusweni
Nay' akaphum' engqondweni
Kusel' ubuhlung' enhlizweni
Xola nhliziyo yami

Kungashon' ilanga
Nana wami
Uma ngingabal' indlela
Engikuthanda ngayo
Kusal' imibuz' engenaz' izimpendulo
Kant' ashoneph' amaphuph' ethu?

Lushoneph' uthando lwethu?
Sokwenzenjan' ngekusasa lethu?
Kant' iqinis' emhlabeni liphi?
Ngoba sathi sohlukaniswa ngukufa
Kungabe lokho kusazokwenzeka na?
Xola nhliziyo yami