Ko Poem by James Corro

Aduna koy sulat nabuhat para nimo,
Di lang nako isugilon kay maulaw ko
Atoa lang ning duha kung pwede ra,
Ay akoa lang diay ni kay masuko ka
Basin masuko ka...

Sa matag higayon nga ikaw malantaw
Ang hanap nga mata'y kalit motin-aw
Sa pagtagbo ning atong mga mata
Mototok ko gamay nya moduko ra
Basin matuko ka...

Sa matag higayon nga dug-ol kay ta
Kakab-uton ko sa kamot nga lagyo ra
Ang imong panit kay labihang hayaga
Di nalang ko mohikap kay masuko ka
Basin mapuko ka...

Sa matag higayon nga ikaw madunggan
Manggilok ning akong mga dalunggan
Bugnaw kag tingog, kini ra'ng nadunggan
Maminaw lang ko nimo, 'yaw suko ha?
Basin manluok ka...

Sa matag higayon nga buhok masimhot
Wala gayud koy mapaniid, imo rang alot
Isog ko pero mahuyang sa imong humot
Moutong lang gyud ko ani kay masuko ka
Basin mag-uko ka...

Sa mataghigayon nga ako maghinuktok
Anaa ka nagtambay sa ubos ning utok
Sa kasingkasing naglingkod, nagtuktok
Hunahuna rani nako ha? Ayaw suko ba
Basin maako ka...