8 Limericks In Scots Poem by Sheena Blackhall

1.Ae dreich drookin nicht near Dundee
A poacher raise up for a pee
A tod bi the burn tuik his tadge fur a wirm
Noo he's cheenged frae a he tae a she

2.A glekit galumph frae Glen Tilt
Gallivantit roon Ghent wi a kilt
Bit he girned like a gowk, fan the glegs fand his dowp
Ower late tae complain ower skailed milk

3.A carnuptious an crabbit auld cuddy
Nippt the hurdies o mony a puir body
Till her ploys were clean connached
A chiel frae Glen Dronach
Stuck her teeth wi a divot o chuddy


4.A braw brosie lassie ae day
Brummil pickin on Bennachie brae
Pit her fit on an adder, it breenged up tae jab her
Her fit noo's as hett's Santa Fé

5.A ferfochan wee forkie frae Fife
Tuik a fantoosh wee flech fur a wife
Fin she flew, he'd jist dauner, the gollach tuik scunner
An hacked aff his fork wi a knife


6.Tattie-bogle wi virr in his bluid
Flegged hoodies wi smeddum an speed
Till a bull tuik a Maddie, cowped it heelstergowdie
Noo dockens growe through its neep heid

7.Peely-wally parten, luikin fur a piece
Plowtered in a plashy puil, aff the coast o Nice
A radgie shark cam passin, gied his shell a punch
An snappit up the partan, crunch, crunch crunch

8. A towrist fa flew tae the meen
Far nane o his family had been
Said ‘Keep Tenerife, an the Great Barrier Reef
The meen's braw an I'm comin again