Zibodwe Zayekwa Poem by senzokhaya umhayi

Zulu oMjukwana kaNdaba,
Nginimemeza emajukujukwini,
Nginivusa emaphusheni nginiphephetha amehlo nganal' usiba,
Nasi isizukulwane senu sizidika sizigwaza ngowaso,
Baphi bona oyise beke besibonise Lesisizukulwane esilahlekileyo,
Obayibonayo abayithandi lendaba,
Abayizwayo bayishaya indiva,
Abafisi ngisho ukuyixoxa esitimeleni,
Nasi isizwe silahleka bekhona osomashishini,
Nakhu sidlebeleka singabant' abasha sivutha amalangabi,
Ubumnand' abupheli anikahleni ngamalangabi,
Lobu busha benu enibudlayo nabo buyaniqhobozela kancane kancane,
Ubumnandi abupheli

Laba ngathi sebeyigxoba emsileni bazinqonqozela bephila emagedeni okufa,
Sebephenduk' amahhashi ngiyesaba mina ngalo qoh,
Bathi bafuna uQoh,

Selimathunzi ilanga ligoq' imisebe yalo,
Usathanane uvul' imizwezwe,
Uhlomile njengo klebe ecathamela amachwane,
Uphansi phezulu uthungath' impilo yomunt' omusha phansi komthunzi welanga,
Kunabant' abasha asebephenduke amahlongandlebe,
Bahamba ezindleleni zobumnyama bethi bathanda ubumnandi,
Usathane ubashayela umtshingo emadlebeni,
Badansela ugubu luka faro,
Both' amalangab' esihogo,
Abasezwa noma bedonswa ngedlebe,
Abanalo uvalo noma sebelengela eweni,
Abakuboni ubumnandi basezweni ngaphandle kobumnandi,
Wen' ongabheng' bakubon' udidekile,
Kant ababoni ukuth bazidekel' ithun' emini bebade,
Bathokoziswa ukushona kwelanga,

Emini bebebahle ungafunga izingelosi zezul' uqobo,
Kant uqamb' ushilo lihlwa ngomnyama kuvel' ok'fihliwe,
Liyadekwe itafula,
Sidedelwe isigubhu esikhafula umlilo,
Akuyona injabulo yokubhenga ungekho umgwinyo,
Badlalisa okwamahhashi lapho beshaya umgido,
Bavule isikokela ubani ongawotha lomlilo,
Ongabhengi uyaloya,
Idedele sibakhothakhothe,
Zidlale izikhothathani zibathakath' ithakathi zempilo,
Izint' ey'hambaphansi abancolisi bamatafula,
Abadli bedwangu abathungi bakakotini,
Operation Phuza friday ungamnaki oseceleni,
Mina ngiyoyicel' ivuthiwe noma ngiyibon' ukuthi isivundile,

Bakhafula amadimoni badansa ezonweni,
Bathi phendula amapuleti lapho Dj,
The night is still young we rather die young,
Bazibona bephethe izulu nomhlaba,
Abuboni ukuduka nokuhlambalaza isithunzi sabazali,
Ihlazo abalazi angithi abazazi izinsizi zomzabalazo,
Abazali ababazi nokuthi bashaya muphi umkenenezo emadlebeni,
Kwelabo ikhanda kubusa igqomu, umgwinyo nophuzo oludakwa imizwa,
Bageza ngamanz' amnyama bakhohlwe ukuthi siyisizwe esimnyama sivelaphi,
Bathi umnandi umqobhothi,
Badla ubusha babo,

We maye bant' abasha,
Lenkululeko eyezinyembezi,
Kwaphuka amazembe kwachitheka igazi kuzabalazwa,
Lapha kwalala amaqhawe nama qhawekazi,
Kwasala izintandane nabafelokazi,
Kwasala amanxiwa kwadingiswa abanumzane,
Ze lenkululeko siyihogele,
Sathola namalungelo,
Kepha nina nigiya ngawo sengathi nithi awasilungele,

Lenkululeko kazi isilungele na,
Uma izosenza sikhohlwe inhlonipho nokuzithoba,
Uma singabahloniphi labazali bazozazi ngobani na ukuthi bangabazali,
Nezazi ngibona sengathi ziyishaya izaba,
Umuntu omusha usephenduke imbawula,
Abazali bayotha ibomvu,
Kazi ziyamazi yini umelusi

Lana zibodwe zayekwa.

By Sєиzσkнαуα Uмнαуi, © 2013, All rights reserved.