Zantyala! -Ntyala! Poem by Anele Potelwa (Unpublished)

Zantyala-ntyala zeemvula,
ndivumeleni ndithi ntyala! -ntyala!
ezath'ukundiphehlela zandenz'imbulu,
ndaphetha ndisoyisakala ukuvul'umqulu,

zantinga ukwehla ngombombo ongenakuzingisa,
zenjenjiya ukufikelela kulo mehlo angenakuntywizisa,
ndazibona ndisindwa ngumthwalo wamachaphachaphaza,
athe ngokuswel'isazela axel'imigulukudu yaseDimbaza

Zantyala-ntyala zeemvula,
Ndivumele ndithi ntyala! -ntyala!
zintingantinga ukufikelela kwabam'oxhongo,
zikhwitshe ke nakumaxhewukazi aseXhongorh'aqab'iintshongo,

Zindicholisa ngezozichenene zamathontsi,
ezith'ubuthukuthuku bam ziingilosi,
ntungo zaphetha zitam-tam ukuthamba,
machaphachaphaza abeth'ebuyelela ngobutshamba,

Zantyala-ntyala zeemvula,
vuma ndithi ntyala-ntyala,
zibhonga kuxhuzul'iinkumbulo,
zandul'uxhokonx'umqulu wengulo,

maxa wambi zilulutho kwiziqhamo zethu,
nangona ziman'ukonakalisa kuluntu lwethu,
ntyilo! ntyilo! amantshontsh'eguzula,
ngenene kanti ayifikanga igalelekile imvula.