Where Maudie Bides Poem by Alexander Anderson

O, Cairn row saft where Maudie bides,
Row saft as saft can be,
There's no' a flower upon thy banks
Can be sae fair to see.
Let a' her dreams be saft as licht
That fa's through simmer heat—
O, Cairn row saft where Maudie bides,
For Maudie's unco sweet.


O, Cairn row saft where Maudie bides,
Where a' the hale day lang
She moves as licht as ony bird
An' in her heart a sang.
An' a' her ain pure thochts to thee
Her tender notes repeat—
O, Cairn row saft where Maudie bides,
For Maudie's unco sweet.


O, Cairn row saft where Maudie bides,
Row saft as saft can be,
They canna boast a fairer flower
Frae Nith richt on to Dee.
An' he wha tak's her by the han'
Maun guide her gentle feet;
Then, Cairn, row saft where Maudie bides,
For Maudie's unco sweet.