Viraat Manav Poem by Shambhu Dan Mehru

Viraat Manav

Rating: 5.0

Hum aaj
apane purvajo se kitne viksit hein
kitne aage hein
unase zyada jante hein
zyada buddhiman hein
maana wo tagde the
lambe the
zyada umr jeete the
jeete hum bhi hein
khoya hai to
jivan khoya hai
baaki kitna hamare paas hai
rajmahalo se kheench laye hein rajniti
ghar -ghar dwar-dwar pahucha di hai azadi
Pradhanmantri se kam nahein hai
ausat adami
khoye hein to siddhant khoye hein
baki kitna hamare paas hai
ye saje -sanware baazar
ye falte foolte vyapar
saikdo aaram ke vishraam ke
saajo-samaan
khoya hai to Imaan khoya hai
baaki kitna hamaare paas hai
wo burzua-bazurg log
aurat ko samajhte the
paanv ki jooti
aaj hamne dedi hai
estri ko sampurn aazadi
khoi hai to maa khoi hai
baaki kitna hamare paas hai
ye hamare vidhyalay
bade bhawan, vishv vidhyalay
yeh hamari parishkrit bhaasha
ye patr-patrikayein
khoya hai to gyaan khoya hai
baaki kitna hamare paas hai
sankeern-sikude chhote
daayron se uth
bahut jaldi janm le lenge hum
ek viraat maanav ke roop me
ek anter-rashtriy maanav ke roop me
tod diye hein
pichhle bikhre chhote chhote daayre
khoya hai to aapsi vishwas khoya hai
baaki kitna hamaare paas hai.

2 Jan 1974

(Pali jate samay)

COMMENTS OF THE POEM
READ THIS POEM IN OTHER LANGUAGES
Close
Error Success