The Bonny Earl Of Murray. A Scottish Song. Poem by Anonymous British

Ye highlands and ye lawlands,
Oh! quhair hae ye been?
They hae slaine the Earl of Murray,
And hae laid him on the green.

Now wae be to thee, Huntley!
And quhairefore did you sae?
I bade you bring him wi' you,
But forbade you him to slay.

He was a braw gallant,
And he rid at the ring;
And the bonny Earl of Murray,
Oh! he might hae been a king.

He was a braw gallant,
And he played at the ba';
And the bonny Earl of Murray
Was the flower among them a'.

He was a braw gallant,
And he played at the gluve;
And the bonny Earl of Murray,
Oh! he was the Queenes luve.
Oh! lang will his lady
Luke owre the castle downe,
Ere she see the Earl of Murray
Come sounding throw the towne.