Nilale Niote? Poem by Abdallah Mpogole

Ipi nzuri niiote, nilale kwake Mandanje?
Je ufalme niote, niwe waziri wa nje.
Niote napaa kote, kama ndege nala punje?
Nifanyeje nioteje, nilalaje niotaje?

Ndoto nyingine yantuma, nisilale nifikiri.
Nimkumbuke wa zama, nisome na kufasiri.
Namwona yule wa chama, hamadi! Nawa jasiri.
Nifanyeje nioteje, nilalaje niotaje?

Oho! Taa zishazima, jamani hakuna kandiri.
Yule sokwe au kima, tuliza hapo subiri.
Ndoto gani isotwama, bughudha nazo kikiri.
Nifanyeje nioteje, nilalaje niotaje?

Nataka niote tena, nionane na wazima.
Walopita wantafuna, waniotesha kiama.
Namtaka aliyenona, kama nyama namtafuna.
Nifanyeje nioteje, nilalaje niotaje?

Nina ndoto Lutakingi, imetoa Marekani.
Zitishe kama Giningi, nimshinde mpinzani.
Wafwasi waje kwa wingi, nizidi kaa chatini.
Nifanyeje nioteje, nilalaje niotaje?

Napenda nawe uwemo, mapambanoni tu sote.
Basi lala kwa kisomo, alfajiri nifate.
Naacha hiki kimemo, waloamini wapate.
Nifanyeje nioteje, nilalaje niotaje?

Yetu yawe mapinduzi, si ndoto za ujambazi.
Mbele yetu ukombozi, mwilini kama tambazi.
Achaneni nazo njozi, pangeni kiutambuzi.
Nifanyeje nioteje, nilalaje niotaje?

Wakati wangu kulala, mang'amung'amu kuweni.
Wasije kututawala, hali tu bado vitandani.
Jigeuzeni jalala, palo pofu i' kichwani.
Nifanyeje nioteje, nilalaje niotaje?