Muhabbat Kitni Hi Masoom Ho Badnam Hoti Hay Poem by Bano Ali

Muhabbat kitni hi masoom ho badnam hoti hay,
In uthti unglion mein meri subh ki sham hoti hay.
Nigahen uthti hayn meri nigahon ko jhukati hayn,
Yeh peyari peyari ruswai tumhare nam hoti hay.
Mere jab humsafar tum ho kisi se mujhko keya lena,
Tumhari har nazar chahat ka ek paigham hoti hay.
Jo ruswa ho nahin pain who tanhai mein roti hayn,
Aur unki zindigi unpar mahaz ilzam hoti hay.
Mere balon ki chandi ab chamakti kahkashan si hay,
Har ek jhurri sitaron jaisi dilaram hoti hay.