Khalani Zinyoni Vele Nizolibusa Poem by senzokhaya umhayi

Khalani zinyoni vele nizolibusa,

Vuselel' ithemba Nkosi uJesu,
Isizwe sakho sidangele Mdali wethu,
Kuyafiwa emhlabeni nsuku nemihla namanga,
Izifo nezingozi zisishwaqa sibhekile,
Imindeni isele dengwane,
Balele abanumzane bemizi bashiya abafelokazi nabantwana,
Balele odadewethu bashiyiz' izintandane,
Nami ngiyintandan' eyasal' ipheth' iphepha nosiba,
Nemibhalo ngizoyishiy' ngemuva sonke siyagoduka,
Bangak' abafowethu nodadewethu abasishiyile,

Ngiyabuka....
Abafowethu basebenza kanzima ezimayini,
Bazikhandla mihla malanga begqom imigodi begob' iqolo,
Phakathi emathunjini emajukujukwini omhlaba ezimayini,
Bezama bewa bevuka bejuluka namafosholo,
Bethwala kanzima bephusha imigqomo yamalahle,
Begubha imigodi ngamahalavu bephehl' igolide nesiliva,
Lezinsizwa njalo makuphel' inyanga zithumela izithukuthuku emakhaya,
Ze imindeni ithokoze zifunde nezingane,
Zibuhlungu izindaba lapho sekufika incwad' encane isithi,
'Kube nokuzamazama eziyamini emathunjini omhlaba, kunabavukuzi ababandakanyekile kulesi sehlakalo, akekho osatholakele ephila,
Amagama abo asagodliwe,
Kusacelakala ilunga lomndeni ukuba livele enkaphanini,
Hho zivele zigwal' amehl' izinyembezi kumama ngomyeni wakhe,
Kanjal' zilel' insizwa zisal' izibongo,
Khalani zinyoni vele nizolibusa,

Mihla namalanga siyehla siyenyuka,
Sihubhana nempande yesono ze siqinise amathumbu sibambe nemimoya,
Odadewethu nabofowethu basuka kude emakhaya bezosebenza emadolobheni,
Ayikho imisebenzi emaphandleni,
Bekumnandi umndeni uhlangene ngoZibandlela,
Aphele amaholidi sekumele kukhalw' ebhasini kubuyelw' esilungwini,
Umama wehla uyenyuka ulungis' umphako wendlela,
Uzofike udle phambili mtanam,
Ngizofona mase ngifikile mama,
Evalelise lifik' itekisi limthathe,
Lize liyahwalala umama ulindele insimbi kamakhalekhukhini,
Eze ezidele amathambo efone,
Luth' ucingo alusangeni,
Ethi ulalele abasiki bebunda,
'Sekube nengozi ebandakanye itekisi emgwaqeni omkhulu onguthela wayeka osuka eMtuba oza eThekwini,
Akekho osindile kulengozi,
Zehle izinyembezi kumama,
Zilale izinsizwa nezintombi,
'Impela khalani zinyoni vele nizolibusa'
Khala zinyoni vele nizolibusa'

Baqashwe ophikweni lengalo yomthetho,
Elwisana nobungebengu ibuye ivikele umphakathi,
Bazinikela ngezimpilo zokuphila kwabo ze begcine ukuthula emphakathini,
Basebenza kanzima ze bengcine indawo iphephile,
Bayazikhandla ze imiphakathi ihlale ngokuthula endaweni,
Badela ngisho ubuthongo beqaphile ngamehlo okhozi ukuthi awukho umonakalo,
Basebenzela imindeni nabantwana,
Abesilisa banemizi bashadile banamakhosikazi athembele kubo,
Abesimame baganile abanye bangabafelokazi baziphathele imizi,
Ziyehlaba futhi ziyephukela emalungeni emindeni uma zifika kanjena,
'Kube nesehlakalo lapha bekutholene phezulu amaphoyisa nezigilamkhuba ngenganono, imoto yamaphoyisa itholakale nezindumbu ezimbili zephoyisa lesilisa nelowesimame, kusolakala ukuthi abasolwa bashaye bachitha akekho otholakele oyingxenye yabasolwa'.

Khalani zinyoni impela nizosale nilibuse.

Zizohamba izinsizwa kuyosala izibongo,
Zizolala izintombi ziyosala zibizwa,
Abefowethu basishiyile bengahlosanga,
Odadewethu balele emathuneni,
Imindeni isele mpununu,
Bebezinikele besebenzela imindeni,
Abasibonanga liphuma lishona elanamuhla,
Alele amaqhawe kepha negeja lisasensimini,
Mihla namalanga sivuka sizinikele siyophanda yona impande yesono,
Akusenani vele yasho iNkosi uShaka,
Leli liyobuswa izinyoni,

Khalani zinyoni vele niyosala nilibuse