Ihanda Ang Sarili Sa Banal Na Hapunan Poem by Bernard F. Asuncion

Ihanda Ang Sarili Sa Banal Na Hapunan

Rating: 5.0

Ihanda ang sarili sa Banal na Hapunan,
Ang pagdalo sa pagsamba ay pagtalagahan;
Itaguyod ang ganap na pagbabagong buhay,
Lubos na isulong ang ikapagtatagumpay.

Tumulong tayo sa gawang pagpapalaganap,
Huwag magsasawang mag-anyaya at maghanap;
Akayin ang tao sa mga dako ng misyon,
Itanyag natin ang pangalan ng Panginoon.

Makipagkaisa tayong lahat sa pagsunod,
Huwag tayong manghihinawa kahit mapagod;
Maging maalab sa kasiglahang espiritwal,
Pagpapalain ang sa Diyos ay nagpapagal.

Sasalo tayo sa dulang ng bugtong na Anak,
Upang kupkupin at huwag tayong mapahamak;
Kakain tayo ng tinapay na s'yang katawan,
Iinom ng ubas na dugong kapatawaran.

Alalahanin nga ang kamatayan ni Cristo,
Na dahil sa Iglesia ay ililigtas tayo;
Tinubos tayo sa ating mga kasalanan,
Ihanda ang sarili sa Banal na Hapunan.

Ihanda Ang Sarili Sa Banal Na Hapunan
Thursday, February 23, 2017
Topic(s) of this poem: faith
COMMENTS OF THE POEM
READ THIS POEM IN OTHER LANGUAGES
Bernard F. Asuncion

Bernard F. Asuncion

Subic, Philippines
Close
Error Success