Igkaduhang Gabie (The Second Night) Poem by Inday Prising

Igkaduhang Gabie (The Second Night)

~kining balak halad para sa ugat, sa kalipay, sa katulog ug sa apo ni flaviano boquecosa

Nanglingkod kita sa ngitngit
Gipamingaw ang mga hunghung
Ug mga syagit
Sa mga kasingkasing
Nga nagsakit

Natumba na
Ang tulo ka kabayo
Ug hingpit nang gitunaw
Ang mani sa katugnaw
Sa huyohoy sa hangin
Nga nikamang
Sa akung kaunoran

Samtang naminaw ang katulog
Sa mga hingawa
Mga gisudya sa kalipay
Samtang nahilum ang batang si Ibarra
Sa kalagot
Sa iyang hinigugma
Napukaw ang mga paghandum

Didto diin kusog
Ang hangin
Ug ang kulba sa kasingkasing
Nagbakho ang iring
Sa wala’y utlanang pagpaabot
Sa pagbalik
Sa igkaunom niyang pagkabuhi

Didto diin nag-abut
Ang mga saag nga dalan
Nabuhi ang mga daang larawan,
Mga septiang larawan,
Nga nipuno
Sa akung mabulokung
Handurawan

Didto diin
Nagdula ang mga cherubin
Uban sa tugnaw nga hangin
Nitukar ang karaang kanta
Nga giduyugan
Sa mga harpa
Ug sa mga gitara

Didto ibabaw sa palasyo
Sa langit
Nikusog
Ang mga hunghung
Ug ang mga syagit
Nga kanunay
Sa akua nanghagit

Ug didto diin
Kita nanglingkod
Sa kangitngit
Magpabilin kining
Mga kasakit

COMMENTS OF THE POEM
READ THIS POEM IN OTHER LANGUAGES
Close
Error Success