Ezandleni Zengelosi Poem by senzokhaya umhayi

Ezandleni Zengelosi



Ezandleni zengelosi

Endleleni sihambile saphila sonke,
Kumnandi sihleli sijabulela ezinohlonze zakwa mhlaba,
Siqaphene ngeso lokhozi sihlezi sibhek' ingozi,
Sibambene ngezandla njalo sihlezi simunye,
Njengokuhleleka kwezinkanyezi esibhakabhakeni,
Omunye ethand' omuny' sivela kanye kanye,
Njengamaphiko engelosi,
Sakhelene njengezinyosi endlini yazo,
Sidl' ingevu ndawonye,
Siboph' inqeph' ewumfaniswano,
Besibona abangasaz' besifanise namawele,
Nanamhlanje ngisamangele,
Uye wayophumula emathunzin' eliba,
Walibala ilobungani obungaka,
Hamba mngani uyophumul' ezandleni zengelosi,

Ukude manje usemfihlakalweni,
Undizile usezweni lapho kusuka khon' imimoya,
Usekugcineni komhlaba ekuphehlweni kwamanzi,
Ezinkanyezini esibhakabhakeni emkhathini,
Ezintabeni lapho kuphumula khon' unyezi nelanga,
Usemnqamlezweni ezweni lokuphumula,
Usendlini yothando noxolo uhlukene nezono,
Emhlabeni ongenamagqubu nanzondo
Uzohlalakahl' ezandleni ezimnene,
Unakekelwe ngesineke sangunaphakade,
Ngokuthula nangoxolo,
Usezandleni zengelosi,

Besinjengamachwane esikhukhukazi ngaphandle kwehhoko,
Ukufa kwafika njengo cilo kwaye kwakucaphuna phambi kwami,
Maye mina ngasala ngitshiyoza ngomngani wami,
Ngasala ngibamb' amaqubu ahlubuke ngenkath' uzam' ukuphunyuka,
Ngakhala inhliziyo yasal' ibamba amagqubu,
Ngasala ngephukil' emoyeni,
Ngibon' umphefulo ongenacal' uphum' enyameni,
Ngabon' umsamo omnyam' uvuleka,
Umngani wami wajubalala nenjabulo yami,
Kufa wangihlwith' iwele lam' lempilo,
Lelizwe ngizolinqamula nobani,
Umhlaba omngaka ogcwel' izitha zethu,
Zonke sezizogiya ngami,
Ngomngan' wam' osewelile,
Wayowela ezandleni zengelosi,

Siza ngelosi yokulunga ungibhekele yena bandla,
Ungigcinele yena ephephile,
Umfihle ngaphansi kwamaphiko akho njengomntwana kuwe,
Uze umphumuze ngaphansi komthunzi ongapheli,
Umphuzise namanz' amtoti edel' ingunaphakade,
Ukhathele izinhlupheko zomhlaba,
Uphumule izihlonono namahlokohlok' asezweni,
Umbeke kwesobumnene sakho,
Bengisathand' ukuba nay' ebumnandini,
Kepha nalapho kuwe akalahlekile,
Sehlukene umzuzwana nje,
Ngiyethemb' uzohlala enethezek' ezandleni zengelosi.

USenzokhaya Umhay

Monday, September 15, 2014
Topic(s) of this poem: death of a friend
COMMENTS OF THE POEM
READ THIS POEM IN OTHER LANGUAGES
Close
Error Success