Combatu Des Vents Et Des Flots Poem by Theodore Agrippa d'Aubigne

Combatu des vents et des flots,
Voyant tous les jours ma mort preste
Et balayé d’une tempeste
D’ennemis, d’aguetz, de complotz,
Me reveillant à tous propos,
Mes pistolles dessoubz ma teste,
L’amour me fait faire le poete
Et les vers cherchent le repos.
Pardonne moy, chere maistresse,
Si mes vers sentent la destresse,
Le soldat, la peine, et l’emoy :
Car depuis qu’en aimant je souffre,
Il faut qu’ils sentent comme moy
La poudre, la mesche et le souffre.