Allah Bachaye Muhabbat Se Poem by Bano Ali

Wuh khawab ju humse rooth gaye bhoole se jab yad aate hayn,
Hum chupke chupke rote hayn aur rote huye so jate hayn.
Phir tare jhilmil karte hayn phir chand chamakne lagta hay,
Wuh geet jinhen hum bhool gaye phir gaga kar dohrate hayn.
Hum chup jate hayn kamre mein tum humko dhoondhte phirte ho,
Aur tum jab jane lagte ho hum hanste huye aa jate hayn.
Un phoolon ki afshan balon mein ab chandi ban ke chamakti hay,
Wuh phool to kabke mar bhi gaye keyun aksar wuh laut aate hayn.
Main sar rakh kar un kandhon per keya keya sochti rahti hoon,
Yeh waqt kabhi na thamta hay yeh khawab magar tham jate hayn.
Aiy waqt mujhe na samajhna hay ja mera peecha chor bhi de,
Main to abbhi ek ladki hoon mujhe ab tak sapne aate hayn.
Us ladki ko zindah rakha hay sajan ne apni nazmon mein,
Jo phool khilata hay shair wuh bhi kabhi murjhate hayn.
Main to tumhari ghazal thee bas lo sheyr bhi ab main kahne lagi,
Allah bachaye muhabbat se hum keya se keya ban jate hayn.