गोरबो इसिँनिफ्राइ -92 Poem by Ronjoy Brahma

गोरबो इसिँनिफ्राइ -92

नै गशाइ लेँहरो नोङो गोजानाव
मिजिँनि गोथौ सोर्गोआव
सानहाबनाया फैयो लामायाव
थाबाय थाबाय थाङो हार्सिङै
-
आंनि मिनिस्लुनायखौ माला साजायना
गोजोन्नाय मोनो नोङो फिसानि
हाबाब आफा नोँनि मुहिमा
मिथि मोनजोबा गासैबो जिउमायादि
-
गसाइ फैबायल' आफा लामायाव साजायना
मिनिस्लु दरखं मोन्नैयाव
गावनिबादि साजायना अरायबो समाव
नायहरो खुलुमना आथिँआव
-
रजे जोमै साजोँ सिँखावना गोसोआ
मेगन बिलिरो फुं आरो खोमसियाव
लोगो मोजां नोङो आंखौ
-
नै आफा फिसा आं नोँनि
थिफुद्ला साजायनाय गोरान सोलेरखौ
हाद्रि बिरनाय मुलुगाव
गलि गलि गोरान गोसोखौ
फै आफा दबथायफै दुथां गोरबोखौ
-
लोगो गास्लिद्ना साजायफै गोथार आंनि
गासैबो मावनाय हाबाखौ
गासैबो साननाय गोरबोखौ
-
फुवा फुवा गनाय गोगो निजोराखौ
लाबो लाबो खाथियाव आफा
बिलिरफै आंनि मैखि खाथेनाय मोखांखौ
लुस्रफै गिरि मैलाखौ गोरबोआव
-
सिमांनि बादायलायनाय आंनि अगेनखौ
हाबाब आफा फोजोबस्रांफै बेखौ
मिजिँनि लामायाव गोरान हाद्रिया
हनै हनै आफा जोबोरै खोमसियाव
-
नै गिरि मा जाखांफैयो आफा
खोमसि हराव नंखायै गिखांनाय
फै फै आफा सोरां सारफै गोरबोआव
खालाम खालाम गासैबो आंनि बेखौ
सोरांखौ लाबो जेब्लाबो दरखंआव
-
मिनिनायनि गोदै रादाबा रिङो
नै गिरि होफै आंनि गोरबोआव
गासैबो हमदांनाय आबुं ओँथियाव
-
आय' अबं हनैदि गोथौ दैखराव
बिरखाङो दैयाव खुवा खुवा बिसोरो
हो आंनो आफा बेखौ
गुबै ओँथियाव बेखेवनो थारै गेबेङै
-
नै आफा आंनि खन्थाइयावदि गैया
गोथौ मुहिनाय गोरबोआव
हो साजायनो समायना सोदोबाव गियानखौ।
-
30/11/2014
गामियाव

Friday, December 5, 2014
Topic(s) of this poem: prayer
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success