जिउनि सल'/8 Poem by Ronjoy Brahma

सानसेखालि थेफाया अरनाव थांबाय
बैसां खाना बिफांआव जमबाय
हरसे मै मासेबो फैयाखिसै
अमा मासेबो फैयाखिसै
-
समा हर बारलांबायमोन
सोरांसि सोरांसि समसै
अरन गेजेराव थर्स सेरदोँ
ख्राब ख्राब थाबायदोँ
-
साथाम साब्रैसो हानजानि मानसि
थेफाया जोबोद गिबाय
''ओइ'' होन्नाय सोदोब खोनाबाय
बिफांनिफ्राय ज्रुम बाज्रुमबाय बियो
-
बहा थाखोमागोन बहा थाखोमाया
जग्रबसे जाबोराव एब्रेबाय
एब्रेयोसो एब्रेयो नांथाबाय
गिनानै मोदोम मावग्लुब्बाय बियो
-
एसेयाव मानसिफ्रा सफैबाय
''जोँसो'' होन्नानै राव होबाय
बिसोर गामिनि लरगमोनसो
बिसोरबो गामिनिनो फलान
-
बेसेबा गुदु बे अरनाव
गिनाय गैया बिसोरनि गोसोआ
बिसोरबो मै अमा गावो
बे अरनखौ सानाव गिदिँथिङो
-
थेफानि गिनाया खारबाय
बियो गोसोखौ स्रां मोनबाय
मेगना गोजा गोजा जादोँ
रजं जांसिया एब्रेनायाव थुदोँ
-
गामिनिनो बिसोरो रायज्लायबाय
मिनि लायबाय आरो
मै मासेबो मोनैनि हांमा सुरबाय
बिसोर नआव गिदिँफिनदोँ
-
दारियाआ बुहुमखौ नागारलांबाय
खायसे बुंदोँ-
जादु मोन्थोरजोँ दायना रायदोँ
दायनायानो बिखौ फोथैबाय
-
बेदर सावनाय समाव
खांग्रांना हार्सिँनो थैदोँ
लोमजानाय दानसे जाबायमोन
थांना थानो गोबां बैसोआ दंबावोमोन
-
दारियाखौ बारियाव फबनाय जाबाय
बेदर एवनानै रद रदयै
बिनो बावहरनाय जाबाय
बिनि जौ बथल दाबखा बावहरदोँ
-
बिनि गानग्रा जोमग्राखौ फबफाबाय
रां रुफा एसे फबफाबाय
जाग्रा थोरसि लथा हरफादोँ
बिनि खुगायाव दै दौहरदोँ
-
दारियानि बिहामजोफोरा गाबहरदोँ
फिसाजोफोरा फिसौजोफोरा गाबहरदोँ
सोरजिगिरिखौ हरखाब सोँखारिनानै
सानसे थांफिननांगोन गावबो बुजिबाय
-
जि साननि उनाव सारादु खुंबाय
रायजोफोरा थालिर फस्लाजोँ बेदर जाबाय
रायजोफोरा जौ फेलायनाय लोँबाय
सोरबा जौ फेनानै मोसाबाय आरो गाबबाय
-
रायजोफोरखौ बोथिसे जाहोदोँ
जौ फेनानै एसेल' मोनजानायाव नांलायबाय
खायसे दारियानि सोमोन्दै सावरायदोँ
जज्ञ होनानै इसोरनि आर'ज गाबदोँ
-
इसोरनि सोरजि माया माया
रावबो मिथिया फैगोन साननि थाखाय
अब्लाबो थांनानै थायो दिनै
फैगोन इयुननि मिजिँनि थाखाय
-
थेफानि फिसाफोरा देरबाय
बिसोर फरायसालियाव थाङो
जोबोद सोलोँथाइ होनो गोसो थेफाया
फिसालाफोरखौ इयुननि थाखाय
-
गेलेनायानो रनजयनि जिउबायदि
बियो दैखरगुरियाव गेलेहैदोँ
मार्बल गेलेनो मोजां मोनो बियो
बियो दिनै फरायसालियाव थाङाखै
-
सोलोँथाइ बिजाबनिफ्राय गेलेनाया देरसिन
बेबादिनो सानो रनजया गेलेनायखौ
मोनाबिलि सम जाबोदोँमोन
जेरैबो खोमसिया साग्लोबफैदोँसै
-
मोनाबिलियाव थेफाया गलियाव मोसौ खाबाय
रनजया दैखराव आथिँ सुबाय
न'आव फैनानै ओँखाम जानोसै सम
थेफाया रनजयखौ बुबाय
-
बुयै बुयै थेफाया बुंदोँ-
दानि गेलेनाया देनांसिम थाया
दिनैनि सोलोँथाइया थायो
बेबादिनो थेफाया खोमा साफ्रेदोँ
-
मोदोमाव मानजा मानजा फैबाय
न' गंसे गोमफबनाय गाबनायजोँ
सुमित्राया बादा होबाय
बेसेबा रुखु रुखु गाबनायजोँ