जिख्लाबसे लाइजाम: 'रैसुमै'नो 713-749 Poem by Ronjoy Brahma

जिख्लाबसे लाइजाम: 'रैसुमै'नो 713-749

713
मोनसे बिलाइ गोसोनि
नोँदि नुगोन साजायनाय
बेयो नोँ आरो आं;
जेब्लाबो अरायबो जुदा नङा
रैसुमै सना सोदोब साजायनाय।
714
माब्लाबाबो गोजान नङा
नाथाय जिउ सिग्लाबनाय मोदै
आंनि बिखायाव नोँनि मुस्रिया
बेसे गोजोन जिरायनाय सायख्लुमाव।
715
मोजां मोननाया राव आंनि
बेसेबा रैसुमै गोरबोनि,
बेखेवनो हायादि गुबुन रावै आं
नोँनि थाखाय, आंनि मेथाइ रिङो।
716
नोँनि अनगा गैया बिखायाव
जोंबाय थानाय मिनिसुलु,
हिरा बादि नोँनि मिनिसुलु
खौऔ जेरैनो नोँनि गारां।
718
आं मेगनजोँ नुयो
नोँ जेरै आंनि सेराव थाबायो,
गोसोआव बार हुब्लिरलाङो
जेरै सोलेरा गोजोन मोनो।
719
आंनि जिउमाया बेंजानाय
नोँनि मुस्रिजोँ फाखनाव,
निजोरा जेरै मिनिसुलु मोखां
मोदान फैयो मनालिसा।
720
आं मोजां मोनो एसेबां
जेराव बाला सेरेफनि गैया मोन्दांथि,
आंहा हास्थायो जेसेबां
सिमा गैया जेसे अख्रांनि
रैसुमै सना जिउ आंनि।
721
नोँ बेनि ओँथिया आंनो
जेसेबां नोँ नाजायो
साबायखर नोँ आंखौ मिथिगौ
नुनायनिफ्राय बेसेबा आंदि।
722
जोँ सानैबो फोरमायाखै
जेराव बयबो मिथियो आराव,
जागोन, आं मिथि होगोन-
समा... नोँनि अनगा आंनि सोर?
नोँ आंनि, आंनि सासेल'
नोँखौ आं जोबोद सानबायो।
723
नंगौ बेनो मुलुगा समायना
जेराव नोँनो दं आंनि मेगनाव,
जोबोद खुसियै, आं नोँखौ मोनो
आंनि बिखायाव गसंनाय नोँनि
आं नोँखौ मोजां मोनो।
724
गैया खन्थाइ, गैया मेथाइ
आं बेखौल' मिथिनो लुबैयो
बेसेबा समायना मुलुगाव
सुग्लाय मोन्नाय गारां नोँनि
आय' बेसेबा आंनि बिखायाव।
725
मिजिँ खानाय हगारनाय
बेरस्रां नोँनि मेगन
आंनि जेरै नागिरनाय
बेवनो रैसुमै मिनिसुलुनाय।
726
नोँनि खाथियाव आं
आंदि नोँनि राजखुंगुर?
बिलिरो आंनि गोरबोखौ
गोमानाय आंनि माबा फैयो-
बेयो बोरै रिफिनाय?
नोँल' गासैबो ओँथिया आंनि।
727
सान ओँखारनायबादि मिनिसुलु
नोँनि फावदुर खावलाय
साबायखर आंनि लामायाव दिनै
लाबोयो बेसेबा गोजोन्नाय
देलोँलोँ रैसुमै सना आंनि।
728
गैया मेसेबनाय एबा मेँनाय
आरो गंस्रिनाय
गोजोँ रिजि हाथाय खिन्थिनाय
आंनि मोजां मोन्नाया बेवनो
दिनै नोँदि गोदान बिलाइजोँ।
729
जुदि बेयाव माब्लाबाबो...
जेब्ला सानसे जोँ सासे जाया
जोथोनै लागोन अब्लाबो गोरबोआव,
थागोन आं बेयाव जेब्लाबो।
739
नाथाय, नोँ नुयो
बे समाव, बारा आं नोँखौ
गावनिखा बादि लायो,
दिनै, फैगोन साननिफ्राय
बारा, थांनाय साननिफ्राय।
731
साबसिन आरो समायनासिन
सान्नानै माब्लाबा नुआ?
एबा जेब्ला सौग्रावो,
बिसोर लोगोसे आमाय-जुमाय
गोरबोआव थाखोमा थाखोमा।
732
बियो आंनि खोमानि नङामोन
रिँखावनाय खाब्रां,
नाथाय आंनि गोरबोसिम।
बेयो आंनि जंखायनाय नङामोन
नाथाय आंनि जिउआ।
734
मोजां मोन्नाया फंसेल' राव
जेब्लासिम सोरबा सासेया
मोजां मोन्नायनि ओँथिखौ बेखेवो
रैसुमै बेसेबा फैलाव गोरबोआ।
735
नोँ मिथिगौ, नोङो मोजां मोनो
जेब्ला आंनि बिखायाव सोबायो
मानोना सोमोन्दोआ जोबथानाय
नोँनि सिमांनिफ्राय बेसेबा सना।
736
नोँ मिथिगौ, नोङो मोजां मोनो
मुलुगा जेब्ला नोँनि मेगन बोलायो
गावनि मेगनजोँ आं नुयो,
आरो मेगना जेरैबो मुलुगाव गिदिङो।
738
मोजां मोन्नाया मोनसे जाहोन
जाय जेरैबा गुबुन बादि रंजायो
समायना गोरबोनि सोरजिया
रैसुमै इयुन नोँनि देराया।
739
मोजां मोन्नायानो आंनि राव मोनसे
गुबुन बादि रायज्लायो नङा?
नोँनि थाखाय, आंनि सैनाय
आंनि गोरबोआव रोजाबो।
740
रोदा नोँनि मिनिनाया साननि
जारौ जोबोद समायना,
नाथाय जेबो मिजिँ गैया
नंखाय बिजिरनायनि;
हास्थायो लोगोसे जिउ समनि।
741
दा आं मोजां मोनो
गाबोन आरो दिनै,
आरो गसाइया सम होयोब्ला
आं नोँखौ मोजां मोनो
थुंगेलांगोन जिउ आंनि खेबसे।
742
जेब्ला नोँ आंखौ गोबायो
आं बेखौनो हास्थायो,
जेब्ला नोँ आंजोँ लोगोआव
आं बेखौनो लुबैयो,
जेब्ला नोँ मिनिसुलु मिनियो
नोँनि थाखाय आं रोजाबगौ-
गासैबो बुब्लिया थुंगेनायनि उनावबो
अरायबो नोँखौ आं अनो।
743
नोङो समायनायै थाबायो
दद्रे दद्रे लाजिसुलु,
मोनाबिलि बादि खानाय बाराव-
आरो हाथरखि बादि हाथाइ रिजि
बेनो बेसेबा समायना बुब्लिया।
745
बेसेबा हायना सारफावनानै
गोरोबदोँ दिनै बोथोराव
अनथाव-बाथाव जारौ सना
लोगो मोनो मेगनाव नोँनि मेगन।
746
नोँनि गारांआ खालामो आंखौ
बेसेबा निजोरा गोजोमनाय,
आरो नोँनि मिनिसुलुनाया
लेँहरो आंनि मोन्दांथियाव
फोरमायनो दैसा सेराव दान्दिसे।
747
मोनसे सोदोब उदांङै
सान्नायनि गासैबो लिरथायाव
आरो बुग्लिजानाय जिउआ,
बे सोदोबा मोजां मोन्नाय।
748
आजाव आंनि होनायखौ
बेयो आंनि मिनिसुलुनाय,
नोँ आजाव खुसियाव
जिउनि अननाय होनायखौ।

COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success