7 Limericks In Scots Poem by Sheena Blackhall

Auld Wife Fae Carnoustie
There wis an auld wife fae Carnoustie
Her drawers war bumshayvelt an fooshtie
The dottled auld feel, bocht a pair made o steel
Noo her drawers dinna guff bit they’re roosty


Kirk in Dunoon
There aince wis a kirk in Dunoon
Fas membership dwinnlit richt doon
Noo wi twice wikkly Bingo, it’s doubled, by jingo
Wi a pie an a pynt served at noon


Banchory Salmon
A Banchory salmon wi speed
Lowped a linn an crashed doon on its heid
A fisher nearbye tuik it hame for a fry
Though it wisna his catch it wis deid.


Tamintoul stag
There aince wis a frichtfu mishanter
Fin a Tamintoul stag wi an antler
Caused a skier tae lowp fin it powkit his dowp
An he cleared the neist brae like a panther


Cauld Kail Hett again
A quinie fae auld Aiberdeen
For her holidays gaed tae the meen
There wis nocht tae be seen bit a rickle o steen
‘I can see thon at hame, ’ quo the deem


Embro Festival Goer
An Embro Festival Goer
Fin the traffic got slower an slower
In the quest for mair speed, found the wye tae succeed
Wis tae gyang on a motorised mower


Glesga Art Lover
A Glesga Art Lover stood still
Like a heron poised ower its kill
Bit his jynts they aa froze as he studied a pose
Till he luiked like a biro refill