जिउनि सल'/6 Poem by Ronjoy Brahma

फंबाया जोबोद अलसिया जाबाय
सान जौनानैसो सिखारो
ना हाल एवनांगौ
ना दुब्लियाव मोसौ खाहैनांगौ
-
उनाव जुदा जाहोबाय थेफाया
फंबायनो हा होबाय
न' गंसे लुनानै होबाय
बेबादि सान हर थाङो
-
सुमित्रानि गोरबोनिफ्राय जोनोम जाबाय
फिसा हिनजाव सनजिमा
बिनि उनावबो जोनोम जाबाय
फिसा हिनजाव रनजिमा
-
संसारखौ गोजोनै खुंबाय
सुखु-दुखु मिनि रंजानायजोँ
आलो गोजोन बोथोरजोँ
बेसेबा साना थांलायबाय
-
मोजां लामा सामा गैयै
रिडिअ सावथुन नुफेरै
मटर साइकेल नुफेरै
आमटेकाया लासैनो जौगालांबाय
-
मिथिँगा गोबां सोलाय लांबाय
बांगाल-बर'-सावथालजोँ
लासैनो बोरैबा सैलायै जाबाय
बेबादिनो बांनो हमदोँ लासै लासै
-
सम सम बुलायो होसोलायो
लबार बाथुलजोँ गावहरलायो
दामा फिथि बुनानै हरो
समाव जंखाय लायना खारो
-
बांगालफोराबो गाज्रि जालांबाय
बर'फोराबो नायनो हायैबायदि
मावथि आखुनि बांगालफोरखौ
खान्थाल थायसेजोँ थगायबाय
-
माय गम हाहोयो बांगालफोरखौ
मायसा फाथो दांहोयो
बेसेबांबा खुसि बांगालफोरा
बेसेबा मावथि बावसोमो गोसोखौ
-
दुलाराइ बर' गामि गामि
मोनथाम उजिबाय
ग्रिद ग्रिद दावहायाव ओँखारबाय
बर'लेण्ड सोमावसारनायनि लामायाव
-
आमटेकानि सुबुंफोरा बाहागो लाहैबाय
बांगालफोरा मेगन साबाय
जोबोद गिबाय बर'फोरखौबो
बांगालफोरा खौसेथि जाबाय
-
बोरला बानायजेनबाय बयबो
थुंग्रि आरो सिखाखौबो उनबाय
बिसोर बर'फोरखौ गाग्लोबसिगोन
गोसोआव गैलिया गोजोन
-
थांस'-फैस' बर'फोरा खोनाबाय
बांगालफोरा जोँखौ गाग्लोबसिगोन
जोँखौ फोजोबसिगोन बिसोर
बिसोर नाथाय मोन्थाइ गोमानाय
-
जायगानि थागिबि बर'फोरा
मिथिनानै जोबोद रागा जोँबाय
रागायाव बोरनाय जाबाय
बयबो हानजायै हानजा खौसेथियै
-
बयबो सिलाइ दैबाय
बोरला जं लाबाय
सिखा खंखाय थुंग्रि उनबाय
गोबां मोनथामफोरा फैबाय
-
ग्रिद ग्रिद बांगाल गामिखौ गाग्लोबबाय
बिसोरखौ गोजानाव होहरबाय
सोरखौबा गावथारनाय जादोँ
सोरखौबा दानथारनाय सुथारनाय जादोँ
-
बांगालफोरा जाय फारा फारि खारलांबाय
मोसौ बोरमा गराय लानानै
दाउ हांसो गारना खारबाय
लानो हानाय लांदोँ हायै थालांदोँ
-
बोराय बुरैफोरा थैबाय
गथ'-गथाय थालांदोँ
न' बां द्लाम सावजाबाय
दाउ हांसो गोबां खामथारजादोँ
-
ब्लाव ब्लाव गोजा अर
बांगाल गामिखौ खामबाय
सान हर खामगासिनो खामबाय
बांगाल गामिया सिलिँखार
बांगालनि फोलेरा गैलिया
-
बांगालनि दाउ हांसो
मोसौ बोरमाखौ लाबोबाय
बर'फोरा गावनि खालामबाय
बांगाल गामियाव बर'फोरनिसै
-
गोदानै हादान गायसनबाय
सनाजुलि बावह्रागुरि बायदि मुं जाबाय
जोबोद आंखालजोँ संसार फाथिदोँ
बर'फोरा बोथोरजोँ मोगा मोगि
-
मोसौ बोरमा ग्रोम ग्रोम
गोम गोम बागान बारि
दाउ हांसो लारि लारि
बिफां बेन्दोँ जेरैबो गोम गोम
-
हाल खदाल गायनाय फुनायजोँ
बेसेबा माहाजोन जाबाय थेफाया
बिदा फंबाय बिसोर गोजोन थाबाय
बोसोरनि उनाव बोसोर आंगोजोँ
-
हार्सिँङै संसार जादोँ सावख्लायाबो
गोसो गिलिर गोबां अलसिया जानाय
थेफानियाव गोबां रुवाथि रुवाथि
गोबां थाफैबाय आरो गलांबाय
-
सानसे थेफानि रुवाथि थिँग्रिँजोँ
सावख्लानि जुलिया जालांबाय
थिँग्रिँआ सावख्लाखौ बरायदोँ
बेबादिनो गोजोन संसार जाबाय
-
जुलि जाबाय संसार खुंबाय
थैस' थांस' सुखु दुखुनि
संसार जालांनो मिजिँ लादोँ
जिउ मोनसे हाल खदालनि
-
नोँ दानागारा आंबो नागारा
अर जोँमानि सेराव गोथारै
गोरबो गोथार आहुति होनानै
समाय खाफालनि गोजा सिन्दुरा
-
बोसोर थांनानै बोसोर गोदान
बोथोर थांनानै बोथोर गोदान फैयो
थेफानि आरोबाव फिसा रनजयनि जोनोम
आरोबाव बेसेबा उनाव फ्रेमानि जोनोम
-
थेफानि बिदा फंबाय गासैबो
गोबां फिसा मोनबाय
सावख्लायाबो फिसा हौवा मोनबाय
लासै लासैनो बिसोर देरबोदोँ
-
बिदा-फंबाय थांस' फैस'
नुसुंसेयावनो संसार जालायदोँ
बेसेबांबा खौसेथियै अनलायदोँ
आंनि फंबाय आंनि आदा सानलायनायजोँ
-
रैसुमै सोमोन्दो खारै खारै
बेवाइ आदा-बाजै आब'
मिनिखुसि रायदाव लायनानै
बेसेबा थांबाय सान दिनै दिनै