जिख्लाबसे लाइजाम: 'रैसुमै'नो 518-561 Poem by Ronjoy Brahma

518
जेरैबादि नागिरो हास्थायना
फैसालि रुगुंआव नोँजोँ आं,
आरो बावा सना-
मोजां मोनो आं।मोजां मोनो।
519
बुहुम मिथिँगा, लामायाव
थांगोन नोँखौ लानानै-
सिमां नङा सान्नाया
फोरगोन लाइजाम गावनि होनना।
520
फोरोँबाय आंनो सुजुनो
महर मुस्रि गासैबो-
गावनि गोथार जिउ बिलाइ
खन्थाइ नोँ आंनि गेजेराव।
521
जेब्ला जेरावनो नुयो
अब्ला नोँ आंनि मेगनाव,
आंनो गोथांथि जायो सान्नो-
जेब्ला जेरावनो नुयो।
522
आंनि गोसोआव जेब्लाबो
गोबाव सम गोरबोआव थाबोदोँ,
गाबनाय मिनिनाय जाबोबाय हार्सिँङै;
नोँनि थाखाय। रैसुमै।
523
सोदोबनि ओँथि दंङ
सावगारिया दा आरो सिगांनि-
गोरबोआव साजायनाय,
नोँ आंनि।नोँ आंनि अरायनि।
524
नोँनो होदोँ थुलुंगा
गावनिबादि गावनि फिसिनो,
थुलुंगा, सान्नाय मिजिँनि।
525
नोँनो होदोँ गसंनो
गावखौ नायनो समायनाय-
सावगारि आखिनो, खन्थाइ लिरनो।
526
नोँ मिथिगौ समनि सानफोरखौ
आं हाथासि नोँखौ नागिरनायखौ,
नायलायनाय मोखांआव-
देलायनाय उन्दै मुस्रिखौ जेब्ला।
527
आं बावगारदोँ नोँनि थाखाय
सोरनिबा अन्नाय साजायनो गावनि,
बेयो गोमालांदोँ नोँनि थाखाय-
माब्रै सान्नो गासैबो बावगारनानै।
528
बेसेबां बोसोरादि बारग'लांखो
बेदि दाजाबनाय अनजिमा दं
गोबां, गोबां जाबाय दाइरि
नोँ हरनाय गाहाम हास्थायनाय सोदोब
नोँनि आंनि।नोँनि आंनि।
529
बहा गोमादोँ नोँनि मुस्रिया?
गोसोखाङो समनि सावगारि,
बहा लोगो मोन्दोँ आं नोँजोँ-
बोलादोँ गावनि दाइरि।
530
मिथिगौ गारबोनाय बिसम्बिखौ
नोँनि साजायनाय सोलेरखौ,
दङ दाबो गोरबो मेगनाव
नोँ हमथानाय गोमो गोथां दखनाजोँ।
531
नोँ सोँनो हागौ आरोबाव
बिनिनो थियारि फिन्नाय होनो
नोँनि गोसो फोजोन्नो-
आंनि थार फोरमायना।
532
आं बावगारय नंला नोँखौ
आंदि बेसेबां नाजादोँ-
होनो नोँनो आंनि
नोँनि साबसिन गोजोन अन्नायखौ।
533
आंनि दाइरिया मोदैजोँ
थरथिँ थरथिँ लिरजानाय नोँनि-
नागिरबायनाय बिखाव नोँनि हास्थायनाय,
थांनो होयो फैसालियाव सान।
534
नेना थायो दिनैबो सिरियै
नोँनि रोजाबनाय मेथाइ-
साबसिन गारांआव नोँ आंनि।
535
नोँ फै आंनि जिउआव
आं थायो जेब्लाबो लामायाव,
नोँनि मुस्रिखौ लानानै गोथार;
नोँ फै आंनि गोरबोआव।
536
नोँ आंनि रोजाबनानै
लाबो मोजां मोन्नायखौ-
थाफै समायना मिनिस्लु रंजानानै
फांथे आरो नंलिया रावनिबो।
537
गोदान बुहुमाव दर्खँआ
आंनि गोरबोआव गेवनानै-
जेब्लाबो सान नोँ,
जोबनाय जागोन नोँनाव
आरोबाव फैया गाहामसिन।
538
गासैबो थाङा आगसिथिँ
आजाव जानाय नङा जोबनाया-
गेवनाय आंनि मेगना
बुहुम बिखा मिथिँगा नोँनि थाखाय।
539
हर सान दांग्रोम बायो
बिखानि दुंबुर नोँनि अन्नायखौ,
आं मोनस'वाखै दाबो
गोथौ थाखोमानाय नोँनि-
गोमो- गोथां, रिगि रिगां मोजां मोन्नाय।
540
सिरि सिरि नागिरो आरो नागिरो
फांथेनाय नोँनि गोरबोआव,
गब्लं मोनसे मोनो खोमा
मिजिँ एब्रे लांनो बिखा सिं नोँनि।
541
गोजोँ उनजानाय बिखाया आंनि
नोँनि थाखाय थियारि-
साजायनाय जादोँ गोरबोआव
ओँखार बोआखै नोँ आंजोँ लोगोआव।
542
लासै लासै थैनायनि लामायाव
जेब्ला सानहरो गोथौ दैमाजोँ-
जंखायनाय मोफ्लाम मोफ्लाम सोरनिबा,
समाय बिखानिल' हां थिफुं थिफुं।
543
फानफ्रेनाय आंनि बिखायाव
नोँनि मुस्रिया मुहि हाबनाय,
साजायनाय आंनि खोमायाव
नोँनि गोदै गारांआव;
बिनो नोँनि आंखौ फोरोँनाय
- नोँ आंनि।नोँ आंनि।
544
मोजां मोन्नाया लावनो हमबाय
गुस्लायै गुस्लायै महर सोलायबाय,
मिनिथाव नङा गोसोनि रावफ्रा
- साननो गोनां गोथौ ओँथियाव
रैसुमै नोँनि आंनि।अरायनि।
545
जेराव मोजां मोन्नायनि सिमा गैया
बे गोरबोआ आंनाव दं,
गोजोँ जोँनाय बिखायाव अन्नाय
गिदिँदोँ बोसोर बोसोर।
546
बावनो हाया नोँनि
गोरबोआव आंनि हाबनाय सावगारिखौ,
रैसुमै नोँ आंनि।नोँ आंनि।
547
नोँनि मुंखौ गोसो खांनानै
गोरबोआव बेसेबा मोजां मोन्नानै
फैबाय सना नोँनि लामायाव
देलायस्लु लाजिस्लु महराव।
548
नोँनि सावगारि बुथुम बुथुम
साजायना लाबाय गावनि होनना,
नोँनि मिनिनाय खनसाय खनसाय
सुजुबाय खन्थाइ आंगो होनना।
549
एथ्रोद जायाखै गोसोआ
गोरान हाद्रि बार-मोदायजोँ,
बुथ्रोद जायाखै सान्नाया
बबेबा हन्थानि दैज्लां दाहारजोँ;
गिसि खायाखै नोँनि थाखाय
आंनि लानाय जिउ गासै मिजिँआ।
550
आंनि खामसाव महराव
नोँदि नुदोँ हाद्रि सिथाबनाय
नंगौ हाद्रि, सोरजिनाय गशाइ,
नङा आंनि हाद्रि जिउ गोसोआ।
551
नोँनि महरखौ गोबानानै
नोँनि सावगारिखौ साजायनानै
मोजां मोनो मोजां मोनो सान्नानै।
552
आंनि मेगननि हांखो मोदैया
नोँनि खन्थाइ आंनि लिरनाय,
नंगौ जिउ बिखानि हाबिला
फैसालि सानैजोँ जिउ जिउनि।
553
थांना थागोन जेब्ला जिउआ
नागारा अब्ला हाद्रि सोलेरा,
मिथिँगा बिखा गोबानानै सना
लिरगोन खन्थाइ नोँनि आंनो;
हां बोस्रालांगोन आंनि आंनि होन्नानै।
554
आंहा फोरमायनो गोसो जाथारो
नाथाय सुंद' नङा ओँथियादि,
आं मिथिगौ सम मोनादि नोँबो बेखौ-
थथोरफो थोरफो हास्थायनाय बिखानि।
555
सोरां दं सोरां दं
आंनि हास्थायनाय मोखांआव,
लाजियो सिखिरि बे समाव
नोँदि नुबाय आंनि मोखांआव।
556
थैनाया फैयो थैनाया फैयो
बिखायाव हां गोजौ गाहाय,
रैसुमै गोमालांगोन हां हगारबा?
आंदि हास्थायो साजायो गावनि।
557
आंदि हास्थायो बेसेबांदि
गोजाम गोदान बैसोआवबोदि,
रैसुमै नोँ आंनि।नोँ आंनि
खन्थाइ आंनि जायख्लं आबिरनि।
558
बिजिरख'नो हायै आंनि गाबनायखौ
हमथा हमथा आंनि गोसोखौ,
रैसुमै, हायो नोँनि मोजां मोन्नाया
हायो बुरखायनो नोँनि गोसो फालिया।
559
आं हास्थायो बिखासे
नोँनि अननाय गोरबो हाजासे,
आं हास्थायो सानैजोँ थं मोनसे
लोगो लोगो जिउ मोनसे।
560
सिरि मोन्ना थायो फुंआव
सिमां फाग्लाया फोजा गारलाङो,
नंगौ मेसेबनाय गैया मेगना
गोसोआ जिरि जिरि बोहैलाङो।
561
गोजोन्नाय मोनाखै नोँखौ बावनानै
सानसुथिर समा फैनानै,
गोसोआव बिलिर फैयो मुस्रिया
सावगारि आंनो गोरबो साजायनाया।