गोरबो इसिँनिफ्राइ -51 Poem by Ronjoy Brahma

आय' आफा मा ओंथि
बुजि मोना आं
जाखांफैदोँ सिमाङाव
गुमुर मोनै
फैसालि गैयै थब्ल' नांनाय
मुलुग लैथोआव ।
जिउनि बोहैनाय दाहार मिजिँ
हायाखै फेजेननो गोरलैयै
ओँथि गैयै
थब्ल' नांनाय लैथोखौ,
मा अबंआ आंखौ बेँदोँमोन
हरखाब आं सिरि मोन्दोँ
नोँखौ गाबज्रिनो
खुगायाव राव गैया
हरखाब मेँग्लिना थादोँ आं ।
मेगन हुफ्लेना सिखारो आं
मिनिस्लु आंनि मेगन फैसालियाव
नुजाबोदोँ आफानि मिनिखैरो,
बेसे समायना बैसागुनि फुंबिलि
नोँदि समायसार अनसुला मिनिस्रां
आरोबाव गासै होखारना नोँ
सोगोम हरबाय गोसोम
जोमै दख्ला ।
अलकदनि उनाव रासिन गिखांनाय
नोँनिनो आथिँआव आङो खुलुमो
आखाय खबजबै आर'ज गाबो
बिलिरहर आफा
आंनि खाफालाव
नोँनि समायना आगदा आखायजोँ
आंनि अनागारि आखलाव
नोँ बिलिर
सार अन्थाइ ।
-
19-04-2014
गामियाव