बोहैथि-4 Poem by Ronjoy Brahma

- रैसुमै नोँ बाथ्राखौ मानो
बोरै बुंनो हायो?
नोँ जोनोमनि ओँथिखौनो बुजिया
जोनोमादि मानि थाखाय मानसिनि?
- आं मिथिगौ आदा
संसार गैयाब्ला जोनोम गैया,
आंनि जोनोम नोँनि थाखायसो
नोँनि थाखायसो आंनि संसार।
मोन्नै मोनथाम सोँनाय दाला आदा
दिनै बेखौ आं लुबैया
आं खोनासंनो नागिरा।
नोँ बेखौल'नो बुं आदा
आंखौ मोजां मोनो होनना
आंखौ जुलि लागोन होनना।
- आं बुंगोन जुदि नोँ अख्रा,
आं जुलिखौ लागोन जुदि
आंनि समायखौ फालियो।
बुं नोँ फालिगोन?
आंनि समायखौ फालिगोन?
- आं फालियो
बुं आदा मा समाय नोँनि?
- आं नोँखौ मोजां मोनो
जुदि नोङो आंनि सेराव फैया
आरो गुबुननि सेरावबो थाङा।
आं नोँखौ जुलि लागोन
जिबोसोर नोङो नेना थायो
सिख्ला जानानै गोथार सोलेरै।
- जागोन नोँनि समाय
आं फालिगोन खुसियै,
बुं नोङो आंखौ नेवसिया
आंखौ मुगैनाय नङा
आंनि खावलायाव नेरसोन
दुंब्रुद मिनिसुलु खुदुमनानै।
- रै... सोरबा नुब्ला!
रैसुमै नोँ...
बेखौ नांलाया रैसुमै
बयबो दं जोँखौ नायहरनानै।
- बेयाव मा गिनाय आदा?
बेयो समाय फालिनायसो,
बेयो जोँनि गोथार सिमांसो
खुदुम आंनि खावलायाव
मिनिसुलु मिनिनानै।
गोसो गोथारै गोजोनै
जायखौ आं हास्थायदोँ खुसियै।
नाथाय नोँ खुदुमाब्ला
आं सानगोन नोँनि नंखाय समाय,
आं थैगोन बेयावनो।
नोँ खुदुमोब्ला आं फोथायगोन
बेयो सैथो बे सैथो
जिउ संसार इयुन मिजिँनि
आं गिदिँलांगोन आदा अब्लासो
गावनि खुलियाव मिनिसुलु मिनिनानै
गोसोनि दुखु मेगननि मोदै
स्राय स्राय खुसियै हुगारनानै।
बुं आदा आंखौ नेवसिया
आंखौ मुगैया होनना
दुंब्रुद नेरसोन खुदुमनानै।
अब्ला जोहोलाव रजे
जिउ मोदाया आंनि
दुंब्रुद मिनिसुलु गोजोन खुदुमनायसै
आङो गोजांस्रिउ गोजोन्नायसै।
बियो जिउनि रजेया बुङो
- बावनो हाया बावनाय नङा
थागोन गोसोआ नोँनि सेराव
आं नाथाय आन्दोआव
सोमखोर मिजिँ रनसायना इयुननि।
नोँ आंनि समायखौ फालि रैसुमै
सना नोँ आंखौ सान
गावनिखा होनना अरायबो।
आङो जोबोद गोजोन्नायसै
मिनिसुलु लजिँनि देरा फारसे
सोमखोर अख्रांआव खेबसे नायना
उल्टा मोखांङै मिनिसुलु रजेखौ नायना,
आङो नुहरो नायहरदोँ आंखौ
जिउनि मोदाय रजे
आरो सोरबा सोरबा
जायफोर जोँनि रायज्लायनाय
जोँनि गाबगुलायनाय
रजेनि दुंब्रुद खुदुमनाय आरो
बिनि बिखायाव आं एब्रेनाय
गासैखौबो नायना थादोँ सिरियै
जोँनि मोजां मोनलायनाय समखौ
जागायनाय रमान्सनि बुब्लिखौ।
9
आङो गासैबो फोरमायो
आंनि हाबिला हास्थायनाय
रजेया गासैबो खोनासंङो,
बियो आंनि अननाय आजावो
आंनो गावनि अननाय होयो।
जिबोसोर रजेनि रादाय
खावलायाव दुंब्रुद खुदुमना
गोसो गोथारै खेबसे बोजबना
जिउ मिजिँ सुजुनाय रजेनि समाय।
अब्लाबो आंहा जिँगा
रजेया आंखौ नेवसिब्ला?
आंनि अननायनि बेसेना
बाङाइ सानजाब्ला!
आंनि महर मुस्रिया
नंखाय दान्दिसेनि सानजाब्ला!
आंहा गोजोन गैयै जायो।
रजेया बोरै दावबायगोन?
सोरखौ लानानै सुखुयै-
आंखौ ना सोरखौ लोगोआव?
सानबायै सानबायै थायो आं।
जिउ गोसो मोनसेयै गोरोबनो
गोसोनि गोजोन गैयैनि
गोजोन नागिरदोँमोन आं
रजेखौ लोगो हमना सासेयै।
हे गसाइ!
आंनि रजेनो नोँ सोरखौ?
आंनि थाखाय आरो सोर?
मिथि हो मिथिगिरि
आंनि जिउमायाव बिलिरनानै
आंनि गियानाव अर फोजोँनानै।
जेब्लाबो आर'ज गाबो आं
जागोन जाया मिलन
रजेजोँ आंनि जुलि
बिजोँ आंनि संसार
सानो आं गोथौ आरो गोथौ
मोदै गबोयो फुवा फुवा
गोरबोनिफ्राय मेगन
मेगननिफ्राय खावलायसिम।
लाइमोन समा जोबोद सना
नाथाय बियो दिँग्रि बथलसो,
जाय बायनो हागौ लामानि अन्थाइयाव
बेयो आंनि मोनसे जिँगा
रजेखौ साननानै आंनि।
10
आंनि जिरि जिरि बोहैनाय
दुंब्रुद गोगो थरथिँसे मोदैया
गाबनायनि ना मिनिनायनि
आंनो आं आखायजोँ आजावना
गोसोजोँ सानस'ना बिजिर हाया।
आंनि मोदै नुनानै
आंनि गाबनायखौ नुनानै
सोरगिदिँ बिफांफोरा मोसायो
दाउसिन दाउलायाबो जंखायो
सुदेम बारा आंखौ बुङो-
दागाब दागाब नोङो
मोदैखौ आद्रि फसर नाङा
हुरागासे फालिजोँ हुगारो आं
हुरागासे फारनै आखायजोँ।
गेवलांनाय आंबो बिबार
नायनो समायना गावदां महरनि
खुदुमगौ खुदुमगौ खोमा खोमा
जेरैबो सिखिरि बिरबायो
नाथाय रजेया फैया सेराव
आंखौ खुदुमनो खुसियै
बियोथ' आंनि गोरबोआवसो
आंनि जिउमायावसो बादोँ।
आंहा मिजिँ बायो
आंनि समायनाया लह्रायलांब्ला!
आंनि फाइलिया रानलांब्ला!
रजेया आंखौ खुदुमगोन
रजेया आंखौ नेवसिनाय नङा?
आं लामा नायना थायो
बिफां- निजोम थावनियाव
ओँखारबोनाय गोरलै साननि
जारौ मिनिसुलु सोरांआव।
नाथाय रजेया समाय होदोँ
फैया रजेया फैया
आंनि खाथियाव समाय फैया,
आङो बोदोर जायो खाथियाव
गोबागौ बोजबना लागौ
खुदुमगौ बिखायाव गेलेगौ
नाथाय बियो फैया बियो फैया।
आङो गोब्राब मोनो
जिउ जुलि रजेनि समाय
आङो खंख्ला खंख्ला मोनो
रिउ रिउ बेसेबा गोजान
बेसेबा गोबाव रजेनि समाय।
आं हास्थायो गोथौ
जिउ रजे जोनोम जोनोमनि
आंनि गासैबो मिजिँनि
बोजबगौ रजे नोँखौ गोरबोआव
आं अरायबो सुखु दुखु।
सम सम साया माया गेलेयो
साननायनि लैथोआव जेब्ला थब्लयो
आं बिलिर बिलिर लायो
अहाया अहाया बियो खुदुमो
नाथाय हरखाब आङो खंख्ला जायो
जिउमानि गोगो निजोराजोँ
साननायनि हांआ सुस्र जायो।
आं सिमां बादिनो मोनो
दान्दिसे गेलेना आद्रा
आरोबाव बुब्लिया गोमायो।
11
आंनि गोसोनि दरजाया गेङो
आं रजेखौ बरायो
गेवलां बिबार जानानै
मोदोमनाय बिलाइहरो आं
खोलो खोलो गुसु बाराव रजेनो
नाथाय साया मायाल' गेलेयो
साननायनि हांजोँ स्रोब गोमोरो।
सानफा गुसु बाराव
आङो गोजाव गोजाव
नागिरबायो बोदोर रजेखौ,
गलि लाङो आंनि सोलेरा
आङो लुफावनो सानो रजेनो
आङो मोदोमफ्रु जाना गथायनो
नागिरबायो बिबार रजेनो।
रजेया आंखौ लामा नायना थायो
जोबोर खुसियै दरखंआव
रावबो गैयै गोगो देरायाव
रजेखौ आं गोबाख्रबो
रजेया आंखौ गोरायै बोजबो
हाजासे खुदुमो, आङो एब्रेयो
नाथाय आंनि साननायनि सिमांसो
आङो गाबो सिरि सिरि।