जिख्लाबसे लाइजाम: 'रैसुमै'नो 399-435 Poem by Ronjoy Brahma

399
गुदुं- गुसु जेराव मिथिँगा
हास्थायो रैसुमै गोरबोआ बेव,
गाबनाय- मिनिनाय जेराव माहारि
रैसुमै बेवनो सानैजोँ संसार;
सानबायो साजायना गोजोन देरा।
400
जेराव थब्ल'ना गगा मोन्दोँ
आं नागिरदोँ बेयावनो मुकथा,
रैसुमै, नोँनि बिखानि गनाय निजोरा।
401
नोँखौ मोजां मोन्नाया
नङा नामा आंनि मोनथाइ?
आरोबावदि दङ नोँहा आंनि-
हेँथा होदो मोनथाइ?
402
आंनि जिउनि आंखाला मोनसे
जेराव नोँनावल' मोनो बेखौ,
नागारा बिनिखायनो मागियो-
नोँनि गोरोबनाय बिखानि सान्नायनि हां।
403
मुगैनाय खालामा मेगनाव नोङो
मिथिगौ जेब्लाबो नुबाय,
नाथाय नोँनि फांथेनाय गोरबोआव
बोहैयाखै आंनि गासैबो।
404
बोस्लायाखै आं सान्नायखौ दा
नोँनि फार्से एब्रेनो बिखा,
मुरुआखै आं हरथौ खोमसियाव
हास्थायदोँ जेब्लाबे सना-
नोँनि निजोरा गोरबोआ गोजोमनो।
405
जायखौ आं नागिरदोँ
लोगो लोगो फंसे रावजोँ
जोबलाङा हां मोनसेयै
रैसुमै, आंनि नोङो अरायनि।
406
गोरबोनि राव, मेथाइ खुगानि
नोँनि आंनि गेजेराव हांखो,
नोँनि मुस्रियाव गोग्लैनाय
गोरबो मेगन गासैबो आंनि;
मुसुरो दाउसिन, रोजाबो बारा
दैबायो जोमैया रादाब
रैसुमै, नोँनि आंनि।नोँ आंनि।
407
सोलेराव गोग्लैनाय जारिमिना
होयो सना फरायनो बिखायाव,
नोँनि आंनि लामानि सावगारिया
गोसोआव लाबोयो गोरबोनि दाइरिया
रैसुमै, नोँजोँ आंजों उन्दै समनि।
408
नागिर नागिर नोङो
दाथा मेँग्लिना गोरबोआव,
गोसोआनो बुङो आंखौ मोकथांआव
नै.. बेनो जागोन गोजोनाया नोँनि।
409
गावनिनो सान्ना गावनिखौ
लाजिया अब्लाबो गिनानै,
नै सना आंनि अरायनि-
बोनथुमना दोन्नाय लाइजामा आंनि।
410
आंनि सान्नायनि सिदोबा रानस्रावो
बे समाव आं मिनिदोँ,
नोँनि आंनि बावगारा बिखायाव
दान्दिसे थाला मारिदोँ;
आरोबाव गोबाव नङा मिनिनाय।
411
सोलो सोलो सोलो
गोबां सोलोआ आंखौ फानफ्रेदोँ,
नोँनो हायाखै फोरमायनो-
बेखौदि आंनो दांनाय खालामदोँ;
अब्लाबो बुङो नोँ आंनि।
412
बिख्लोनि रावआ उनफिनाखै
दङ जेब्लाबो जमनानै,
नोँनि बिखानि दरखं सेराव;
खेँगोन फर्दाखौ आसा थिनानै।
413
सान्नायमानि सोदोबा इसिँआव
गोरबो दाखासे गुसु हांआव,
थांलाय-फैलाय सनानि-
थेथेजानाय हां बान्दोनि।
414
गोबां सान्नायखौ फोरमायनो
थाबथाफिनो बिखायाव हायाखै,
जेसेबां हास्थायनाय गोरबोनि
बाथुमना थाफैयो बुंनायजोँ बिखानि।
415
गोथार आंनि अन्नायखौ
गोरोबना होगोन नोँनि गोरबोआव,
जोमै बादि साया जानाय मोखांआव
लाबोना होफै नोँ मिनिनाय
फ्लाम फ्लाम मेगन बिखायाव।
416
फंसेल' रावआ जेब्ला रिँगोन नोँनि
जेरैबादि मैला नङा खोमायाव,
आंनि सान्नायाबोदि गेबेँ गोरबोआव
बिजिरगोन नोङो गोथार बोजबनायाव।
417
लागोन लागोन लागोन आं
गोरबो सान्नायजोँ बिजिरना बिखायाव,
नोँनि गोरोबनाय फंसे सोदोब खुगानि
रैसुमै नोँजोँ आंनि जुलिसेनि।
418
आंनि खुगानि गनाय हांजोँ
गैया रिङा नोँनि आंनि खाथियाव,
आरोबाव रिङो गोदै मेथाइनि
नोँनि आंनि गेजेराव खबामनि;
रैसुमै, नोँ आंनि।नोँ आंनि।
419
आंनि मेगननि लुबैनाया
आंनि थाबायनाय लामायाव,
आंनि सान्नायनि रुगुंआव
नोँनि मुस्रिया मिनिस्लुनायाव;
रैसुमै गोरोबनाया सानैजोँ हरै-
समायना गोरबोनि देरायाव।
420
गोरोबनाय गैयाब्लाबो दिनै गोरबोआव
नेयै नेयै नेयै थाबायो,
लाजिनाय गैयै लुबैनाया मिजिँआव
साजायो आंनो हौवागोदान महराव।
421
हां मोनसे सोदोब नोँनि थाखाय
बेखौ बुंनो आंनि जोनोम,
सोलेर मोनसे हास्थायना साजायनाय
बे लुबैनाय जिउआव खेबसे;
रैसुमै नोँजोँ गोरोबनो जोनोम खेबसे।
422
मिथिया नोङो आंनिनो
लाजिस्लु मिनिनाय मोखांनि,
अराय सम साजायनाय दङ;
बावनाय नङा, बायफ्लेया मिजिँआ
रैसुमै नोँ आंनि।नोँ आंनि।
723
हास्थायबाय थागोन आं जिउ
गाबै गाबै हांमायाव सान्नायनि,
फोरमाय फोरमाय लागोन गासैबो
मोजां मोननाय सोदोबनि-
थांनाय नङा गासैबो फेलेँसिम।
424
थाबायलांदोँमोन आं लामाजोँ
सावरायबाय थानाय नोँनि सेरजोँ,
माबे सान्नाया गाग्लोबो बिखायाव
गंस्रिना थाङो मिजिँआव,
रैसुमै आंनि हांआ नोँ आंनि।
425
रावबो गैयै उदां लामायाव
नोँनिल' सान्दोँ गोरबोआव,
आरो गोथौ लोगो लोगो-
मिजिँआव आंनि गोरोबनाय।
426
जिउ बुंजासे मोकथां महराव
हाथासि, नाजानाय आरोबाव मिजिँनि,
रैसुमै, नोँ आंनि।आं नोँनि।
427
नोँनि आंनि फेलेँआ फैया
जेब्लाबोदि सानैजोँ गोरोबनायाव,
रैसुमै, सना नै आंनि-
मोकथां लामानि हान्थिनायाव।
428
सोर जाखो नोँनि मेगनाव
लाजिया फांजिया मिनिनाया?
नोँनि मुस्रियाव गोमो हाबनाया,
सोर जाखो बे जोहोलावआ?
रैसुमै, सानबायो सौग्राव सौग्राव
सानस्रि आंनि बिखायाव।
429
नोँनि मिनिस्लु मिनिनायखौ
नोँनि जारौ महरनि मुस्रिखौ
जेब्लाबो जेब्लाबो समाव
मोकथांनि थाखाय देरानि-
नागिरो आं गावनि थाखाय।
430
फोरमायनांगौ गोरबोनि बाथ्राखौ
बोथ्रोद फिनो आंनो इयुनाव,
बोहैनाय रादाब बिखायाव
लुबैखाङो हरखाब खेँफोरनो
दामोल जानाय बिलो सोलेरनि।
431
थैयाव नोँनि गासैबो हाबनानै
दं गलिना बिलोआव,
जेरैबादि फैयो दैज्लांआ सानसे
नोँनि बिखा गोरबोआव उसिग्लाबना
रैसुमै, गोबागोन बिलिर बिलिर।
432
बबाव दङ नोँनि अन्नाय?
दांग्रोम बायो आं सान्नानै,
गोरोबगोन बेसे इयुनाव आंजोँदि-
फिस्रियाखै आं नोँनि गोरबोखौ।
433
होंगो दोँगो लामायाव
नोँनि थाबायनाय गोसोआ,
मादि सानदोँ आंबोदि गोरोबनो
सेर सेर खोमसिया बिखायाव;
थोर थोर मावनाय गोरबो बिख्लोआव
अब्लाबो आंनि हां, नोँ आंनि।
734
हास्थायनाय गोरबोनि गोजोन्नाय
थांना थागोन आंनिनो बिखायाव,
हांमा दाहाया फेलेँनि फैब्लाबो
बिखायाव गोग्लैथोँ, अखा सोलेराव
गोजोन्नाय नागिरगोन मेगनाव।
435
नोँनि रिफिनाय मेगनाव
महर मुस्रि गासिबो आंनि,
लामायाव नोँ आं मोखांआव
मिनिस्लु-लाजिस्लु, राव गैया।