बोहैथि-3 Poem by Ronjoy Brahma

आं गाबो आंखौ सोगाबो
आंनि मिजिँखौ नाथ्रोदनो नाजायो
आंखौ खास्रि बिस्रि सोगाबो
सोदोब ओँखारनाय आं गाबो।
मोखां हुगार हुगार
मेगन बिसि बिसि
लोगोफोरा आंखौ नायहरो
आंखौ मादि सान्दोँ बिसोरो
आङो गाबो आरो गाबो
बयनिबो नोजोर गोग्लैयो।
जिउनि रजेया आंखौ एंगारलाङो
आङो मोदै हुगार हुगार सानो
गयो अब्लाबो मोदै थरथिँ थरथिँ।
आङो जोमै जायो
बारजोँ बुगथिँ जायो
गाबै गाबै आं देरा मोनफैयो।
7
बबि आंनि फोरमायनांगौआ
बिजिर जाबाय रजेनि गोरबोजोँ
बुजिबाय रजेया आंनि हाबिलाखौ।
सानै सानै आं गोग्लैसोयो
मोदैजोँ सिग्लाबो गान्दुआ
आंनि हास्थायनायखौ रजेया
नंखायसो मोन्दाङो गोरबोआ।
आङो सहायनो हाया जायो
आंनो रजेखौ नांगौ नांगौ
नागिरो गोथौनिफ्राय गोथौ
रजेनि अननाय आरो फिन्नाय।
आंखौ सिमां नुयो
रजेजोँ आंनि गोथार जुलिया।
हे गसाइ!
आंनि सिमांआ सिमां एबा
जागोन मोकथां सानसे?
हे मिथिगिरि अरायबो
आंनि थाखाय बे रजे
गैया आंनि थाखाय जिउ रजेनि अनगा।
हे सोरजिगिरि!
हो बे रजेनो बिजिरनायखौ
आंनि दिदोम गोथार
गोगो हास्थायनायखौ।
आङो सहायनो हाया जायो
थांगौ थांगौ रजेनि सेराव
फोरमायनो बिखानि गोगो हास्थायनायखौ,
गोजोँ गोरबोनि सावगारिखौ
बोलानो गोजोँ दिन्थिनो।
आङो सहायनो हाया
रजेनि मोजां मोननाय अराय
नांगौ आरो नांगौ।
दाउसिन दाउला गाबफैयो
गेवलां-गेवथां बिबार बारफैयो
नायै नायै आं गाबो
बिफां-लाइफांआ आंखौ रंजायो
नाथाय आङो खंख्ला खंख्ला
रजेनि अनगायै बहा रंजानाय?
आङो गाबो आरो गाबो।
हरफा गाबो मोदै गयो
गान्दुआ सिग्लाब जोबो,
जारौ साना ओँखार बोयो
मोनाबिलि मोनाबिलि हाबलाङो,
बोथोर फैयो बोथोर थाङो
आङो आन्दायो रजेनि गोरबो थब्लनो
रजेनि आङो आन्दोआव थायो
सिरि सिरि हास्थाय खोमायो।
गुसु बारा बारबोयो
रजेखौ अराय हास्थायो,
दाउसिन-दाउला गाबफैयो
सिखिरि बेरे बिरबोयो
आङो एरायखे एरायखे थायो
एमाव गोलांना गाबखोमायो
रजेखौ मोजां मोनखोमायो।
खन्थाइ लिरो, मेथाइ सुजुयो
मोनगोन मोना रजेनि सिमां रनसायो,
सिरि सिरि रंजायो
इयुन मिजिँ रनसायो
नाथाय बांसिनै आं गाबो
जागोन जाया जिँगा सिहाबो।
आर'ज गाबो गोरबो मागियो
सिरि सिरि अबंनियाव बियो
सिमां नुयो, साया-माया गेलेयो
आलो गोजोन संसार जायो
रजे जिउ मोदाय आंनि
आङो जेब्लाबो सानो गावनि।
फोरमायबाय खेबसे फिन्नाय गैया
हास्थायबाय गोरबो मोना
सिमां नुबाय, मोकथां गैया।
गाबो आं सानै सानै
उल्टां-फाल्टां रजेखौ आसायै
नाथाय आं बोदोर जालाङो
रजेखौ गोरबोआव बोजबनो
रजेनि सोलेराव एब्रेनो।
8
गुसु स्रो स्रो बारा बारदोँ
आङो हास्थायनायनि रुगुंआव
गोसोनि सानबोलावरियाव
गोसो मोदोम बोदोरसिन जादोँ।
गोर गोर आङो खारलाङो
फंसे बाथ्रा लानानै
जोबथा फिननि बाथ्रा नागिरनानै
जिउ रजेनि देरासिम।
फुंनि मिनिसुलु जोँमा साना
रजेखौ मिनिसुलुसिन साजायो
रजेया आंखौ नायगोमोयो
आंनि महर मुस्रि गासैखौबो।
आङो मेँग्लिनाय गोसो लाना
गोसोखौ गोरा खालामना
जिउ मोदायनि सेराव थाद'यो।
रजेया गोमोनानै सोङो
- रैसुमै, बेरे फुंजानि मानो
मानो सोरांस्लाब मोनै
मा खौरां लाबोदोँ रैसुमै?
- फंसेल' बाथ्रा गोरबोनि
नोँनि अनगा आङो गैया।
नोँनि फिन्नाय मोनाब्ला
नोँनि खुदुमनाय मोनाब्ला
आङो खुसियै गिदिँ फिना।
- रैसुमै नोँ दाबो बेबादिनो!
नोँनि बैसोआखि जादोँ?
नोँ मानो एसेबां गोजावदोँ
मानो नोङो बुजिया रैसुमै?
- आं नोँखौ मोजां मोनो
आं नोँखौ हास्थायो
अराय जिउनि आदा
आं नोँनिनो अननाय नागिरो।
- आंल' हायोना रैसुमै
अननाय होनो नोँनो?
आंल'खि हायोना नोँखौ
जिउ गोजोन होनो?
नोँ गुबुननि सेराव थां रैसुमै।
आङो हब्रा हब्रा गाबो
मोदैया लाला-लिला बोहैयो
आङो हब्राना बुङो
- आं थैगोन नोँनि अनगा
मोजां मोना जुदि नोङो बुङो,
आं मिनि मिनि थैगोन
नोङो जुदि नेवसियो,
बुं आंखौ मोजां मोना!
- रैसुमै नोँ बुजिया
मोजां मोननाया मा?
- नङा रनजय आदा
नोँसो बुजिया बियो मा?
आं थैनो हागौ आदा
गोथार मोजां मोननायनि थाखाय
आंनि हास्थायनाय नोङो नेवसियो!
- रैसुमै नोँ खोनासं
लाइमोन समा जोबोद गुरै
जोबोद आरो समायना,
बे समखौ नोङो
गोरोन्थि गोसोनि बान्दा जाना
होनो नाङा थानो।
रैसुमै गोसोखौ सामलाय नांगौ
मोजां सानाव मोनफिनै जायो
नंखाय बाराव हगारोब्ला
जुदि सना लाइमोन समखौ।
रैसुमै आंहा साननाय दं
नोँ खोनासं रैसुमै
बे समाव बे बैसोआव
मोजां मोनलायनाय अदेबानि लाइमोननि,
हाबिला थौहाबनायखौ आङो
गोनांथिथार होनना सानाखै।
दुखुआ फैगोन रैसुमै
जुदि मोजां मोननायानो थगायब्ला
एबा बेयो थेर बेथेर जायोब्ला।
नोँ गोसोखौ हमथा रैसुमै
नोङो आंनि खाथियाव दाफै
गले गले नोङो
जाम्बि दाखालाम गावखौनो।
- आङो.... आं
थारै नोँ आंखौ मा सानो?
नोँ बेखौल' बुं आदा
नोङो थारै आंखौ नायनो हाया?
मा नोँखौ आं...
नोङो आंखौ मोजां मोना?
- रैसुमै आंहा राव गैया
नोँनि फिन्नाय होनो,
नाथाय नोँ मा सानो बुं
नोँ आंखौ मानो हास्थायो?
मानो मोजां मोनो?
- आदा, नोँनि सानस्रियासो
आंखौ मोजां मोनहोयो,
नोँनि गोथार गोसोआ
आंखौ हास्थाय होयो,
नोँनि गियान आखल-आखु
आंखौ फोरोँङो अराय
थैस'-थांस' मोजां मोननो।
आंहा जेसेबां गुण दं
आंहा जेसेबां गियान दं
नोँ आंनिख्रुइ नै गुण
नोँहा गोथार घोरोम दं
बेनो आंखौ थिनो आदा
बेनो आंखौ फोरोँदोँ
आं नोँनि आदा
रजे नोँ जिउ आंनि।
बुंदो दानिया नोँ रजे
आंखौ मा सानो
आंखौ गावनि सानोना साना।
- रैसुमै नोँ...
- बुं आदा नोँ थारैनो
आंखौ मोजां मोना?
आंखौ गावनि साना?
थारैनो नोँहा सोरबा दं?
नोँ सोरखौ मोजां मोन्दोँ
एबा सोरखौबा हास्थायदोँ?
- रैसुमै गैया आंहा
रावबो गैया मोजां मोननाय,
मोजां मोना होननानै सान्दोँ।
- आंखौ थारैनो मोजां मोना?
आंखौ नोङो बोजबनायबो नङा?
नोङो हार्सिँङै थांना थानो हायोब्ला
आंबो हार्सिँनो थैनो हायो आदा
नोँनि अनगायै आं थैयो।