जिउनि सल'/2थि दारिया Poem by Ronjoy Brahma

आमटेका हादाना बेसेबांबा अरन
बेयाव सिखार खालामो दारिया।
मैया अमा गावथारो
सिलाय गादा लानानै जमो
बेबादिनो संसारखौ दैदेनो।
*
लावख्रिबारिया गेदेर अरन
मोसा मुफुर मैदेर
सानथ्र हायै जिब जुनार
सानथ्र हायै दाउराइ दाउमासार।
*
बियो गोगोम गिथाव अरन
जुनारफोरनि नेरनाय सोगोमनाय
बे अरनाव दारिया सिखार खालामो
गैया गिनाय फावसयनाय।
*
जानजियाव थुंग्रि खानानै
फाफ्लियाव सिलाय गादा लानानै
बे अरनखौ दारिया गिदिँङो
बे अरनखौ थुब्ला सिँखावो।
*
सानसेखालि गुदु अरन सिङाव
दारिया नुहैबाय-
मैदेरखौ मन'नो हमदोँ जिबौ उद
गोलाव बेसेबांबा गिदिर।
*
लानजाइखौ दंफांआव फान्नानै
बुद्रुनो हायैबादि बोलोजोँ
जिबौ उदआ मैदेरखौ बाग्रायदोँ
लासै लासै फोथैनो नाजादोँ।
*
बोलो गोमानाय मैदेरा गाबदोँ
दुलाराइ अरना गोमफबदोँ।
अरननि जिबि दंनायमानि
गिबाय दाउसिन दंनायमानि।
*
मोसा मुफुर गुबुन मैदेर
लख्रा सिंह सियालमोना गिबाय
नायहरनोबो गिनानै खारबाय
मोख्रा जाथिमोना दंफांआव गाखोबाय।
*
संदानै संदानै दारिया नुहैबाय
गावनि गोजोँ गोबौ थुंग्रिजोँ
खायदा लानानै खेबसेनो दानसबाय
गिनाय गैयै बोलो होनानै।
*
जिबौ उदआ सनै जाबाय
साखाथि फाखाथि थै बोहैबाय
बिफां लाइफांआव मैदेरनाव
जिबौनि थैया अखा हाबाय।
*
हां गहां गहां जानाय
थैहां थैहां बोलो गोमानाय
मैदेर बुन्दाया गोमोबाय
रैखा मोननानै जोबोद खुसि जाबाय।
*
दारियाखौ खुलुमबाय बियो
लासै लासै लोरबां सोलेरजोँ
हाया हाया थाबायलांबाय
दारिया नायहरबाय थाबाय।