अरननि दाइरि 2.07 निरि दैसानिफ्राइ Poem by Ronjoy Brahma

352
अरननि मिनिसुलु मोखां नुना
रुम्बांनि गोजोँ मोखांखौ नुनानै,
दैसाया गोगो मिनिस्लुयो
हालो दैलो लासैयै बोहैयो।
353
दैसानि थमेनहां बारहां बिबारफोरा
समायना रमायना गेवलांङो,
खोलो खोलो बार बारनो हमो
जानसि सोमावना बिफांफोरा मोसायो।
354
उरां मारि मारि दाउसिना बिरबायो
अख्रांआ आबुर गैयै स्रां,
समायना जायख्लं नुजायो दैसायाव
बिबारनि मोदोमनाय गोसारो।
355
दैसानि सेर सेर हानजा हानजा
दाउसिनफ्रा बाग्लाय फैयो,
समायना रमायना गोमोथाव
मिलौहाब रैसुमै मेथाइ रोजाबो।
356
बिफां सा सा थिखिनियाव
दाउसिन दाउलानि रंजानाय,
ओँखारबोयो दैसा सेराव जिउजिबि
खुसियै रुम्बांआ नायहरो।
357
लावजिद गुरै आखायजोँ
दिन्थिहरो बियो अरननो,
अरना रंजाखाङो अखाफोर मोखांजोँ
बारा सिफुं सुयो अरनाव।
158
रुम्बांआ खुसियै बुङो-
''नायहर आंनि रजे समायनाखौ,
बेसेबा गेवलांदोँ सोर्गोबादि
समायनाया बेँखनदोँ जोँखौ।
359
खोनासं नै आंनि जोहोलाव
बाराव गोजावबोदोँ मेथाइ,
बेसे गोदै थांना थानायनि देँखो
बेसेबा मिलौहाब सुदेम।
360
नायहर बारजोँ मोसादोँ
मिनिसुलु देमलो गुरजां रंगिना,
बिबार बारहाबदोँ मिनिगेवलां
दैसाया मिनिसुलु मिनिदोँ हनै।
361
रजे नोँ बाथ्रा बुंनो हानायमोनब्ला
आंनो खिन्थागौमोन सल',
दैसानि सल' सोर्गोनि सल'
नैबे मिथिँगाफुरिनि गोजोन सल'।
362
आंनि बिखाजोँ बारा बिलिरलांदोँ
नायहर हनै अख्रांआव,
बिबारदोँ गुमुर मैला गैयै जोमै
जरा जुलि जुलि दाउसिन।
363
जोँनि खुसिनि मोखां नायनो
हनै रजे हाजोआ आज्लंहरदोँ,
आय' हाबाब बेसे मेथाइ
नोँबादिनो गासैबो बबा रजे।
364
गोरबोनि बाथ्राखौ गोरबोआसो मिथियो
नोँ फोरमायदोँ नङाना जिउ?
बेसे गोजोन सुदेम मिलौहाब
जिउआव नोँखौ लोगो मोन्नाया।''
365
बेसेबा खुसि रंजानाय गोरबोजोँ
रुम्बांआ दैसायाव दुगैयो,
अरना अन्थाइ थाफायाव जनानै
रंजालु मिनि गेवलां नायहरो।
366
बेसेबा गोजोन मिनिस्लुनायजोँ
बियो रुम्बांखौ नायहरो,
दाउसिनफ्रा हानजा हानजा बिरबोयो
दैसायाव सानस्रि फैयो बिसोर।
367
रुम्बांआ गेजेर गेजेर सानस्रियो
आखाय फायखन्ना अरनखौ लेँहरो,
खाथियाव फैनानै दैयाव बोलाङो
बिसोर सानैजोँ दुगैयो।
368
बेसेबा रंजानायजोँ रुम्बांआ खुदुमो
फिन अरना रुम्बांखौ खुदुमो,
दाउसिन दाउलाफ्रा बिरग्लाङो
जिउ जिबिया गाबख्रावना खारो।
369
अरनाव खैफोदनि गाबख्रावनाय
अरननि मोखांआ खोमसि जायो,
अख्रांआ खोमसि जानो हमो
बिफां लाइफांआ गंस्रियो।
370
निरि दैसानि महरा नायथावै
हाजोआ बोराबलु जायो,
हरखाब रुम्बांआ सोमोनांहाबो
अरना सोमोहांनाबना थायो।
371
दान्दिसे उनाव सिलाइनि सोदोब
ग्रुमग्रुम गोसायै गोमखाङो,
फालोसे फलानफोर सफैयो
सिलाइ गावनानै होयो आरोबाव।
372
बाग्दावनायजोँ अरना खारलाङो
रुम्बांआ दैसायावनो थालाङो,
अरन खारलांनायखौ नायहरो बियो
फलानफोरखौ नायना गोमोयो।
373
फलान सासेया बुंनो हमो-
''एसेबां अरन गेजेराव
सोर जाखो नोँ सिख्ला?
मोदायसो ना मानसिनि फिसा?
374
अरन गेजेराव मोजां मोनलायनाय
बा बेसे नायनो समायना,
बेसेबा समायना खुदुमलायनाय
दैसा गेजेराव अनलायनाय।
375
बुं सिख्ला मोदायना मानसि
सेंग्राया मानो खारलांखो?
नायबाय थागौ मोनदोँमोन
एसे समायना दैसायाव।''
376
सासे फलाना बुंबाय-
''गोमोथाव लोगोफोर गोमोथाव,
मेगना आनलेद नांबाय आंनिया
बियो मोदायसो जागोन।
377
गावदो माबार सिलाइजोँ
अरननि सिख्ला बियो,
गावदो सिलाइजोँ गावथारदो
गोमोर लांथारनोसै हनै।''
378
सासे फलाना सोँबावबाय-
''सिख्ला नोँ सोर जाखो?
गोमोरलांदो माबार गावनोसै
बुंनानै लादो सोर नोङो? ''
379
गिनाय आरो लाजिनायजोँ
रुम्बांआ लासैनो बुंनायसै-
''आं मोदायजो नङा मानसिसो
बे अरनानो आंनि न'।''
380
फलाना आरोबाव सोँनायसै-
''नोँ मोदायना मानसि?
आं रोखायै हमनो हायाखिसै।
381
बे अरन गेजेराव नोङो
मानो थाखो नोँसोर हाबाब,
बेसेबा गिलुबालु अरन बियो
मोसा दं लख्रा दं।''
382
सिरिया रुम्बांआ बुंबाय-
''थांदो फलानफोर नोँसोर,
बे अरनखौ नागारनानै
बे अरननि गासैबो आंनि।
383
आं गिनाय जोबोद मोनदोँ
नोँसोर मै अमा गावथारगोन,
अनजाथाव बिरबायनाय दाउसिनखौ
नोँसोर गावथारना जागोन।
384
थांदो फलानफोर नोँसोर
बे अरननि गासैबो आंनि,
जिउ जुनारखौ दागावथार
समायना अरनखौ दासोगाब।
385
नोँसोरनि अर सुखांनायजोँ
बे अरना खामलांबोला,
जिउ जिबिया थैजोबथारगोन
आंनि गोजोन देराया हांगार जागोन।
386
थांदो फलानफोर नोँसोर
बे अरननि आंनो रानि,
गासैबो अरननि आंनि आंगो
दागाव दागावथार दुखु दाहो।''
387
सासे फलाना बुंनायसै-
''आयौ लोगोफोर मानसि नङा,
मोदायसो बियो गमामा मोदाय
थुदो थु खारदो माबार।
388
सासे फलाना बुंबाय-
''नङा नङा बेखौ गावदो,
बियो जोँखौ बुथारगोन
बियो गोमोरसिगोन माबार।''
389
सासे फलाना बुंबावनासै-
''नङा बियो गमामा थगायदोँ,
बियो अरननि रानि नङा
बेखौ हमनांगौ लोगोफोर।
390
बेखौ लानानै थांनांगौ जाबाय
हम हम आं हाबा खालामगोन,
बियो आंजोँ समायथारगोन
बियो मानसिसो मानसिथार।''
391
माखासे फलानफ्रा खारनो हमबाय
जाय जेरै एरैनो खारलांबाय,
गासैबो खारलांबाय जेरैबो
दाउसिन दाउला रंजाफैबाय।