थिरिँ बिरिँ 1451-1500 Poem by Ronjoy Brahma

1451
आंनि गंसे अख्रांआव
ना खान्दानि बाथोन जायो
आरो आं गोग्रोमहरो
आंनि गोब्रा गोरबो आखायजोँ
1452
आंनि अख्रांआव उरायो बिरखं
आरो आं नायहरथारो
नुवा फाथो बेजेँनि जोमैयाव
ना खुसियानि एब्रेसिनथारो
1453
आंनि अख्रांनि बबेबा खथायाव
दाउ मैना दाउलुरनि मेथाइ
आं नागिरो जोमै बिलाइ बोलानानै
मोदोम फैयो मुं गैयै बिबारनि
1454
आंनि अख्रांआव फाथो बेजेँ
दैज्लांनि मोदोम गोरलै दुब्लि
आंनि अख्रांआव गब्लं दाउ बिदै
बामब्लेमा जे आयना गोबाय
1455
सोमस्रि लाइस्रिमोना हालजांख्रा जादोँ
बुदां दाखुरामोना हालेवदोँ,
आंबो आलि खोफादोँ
दुब्लियाव हाब्रु सारलायदोँ।
1456
जुमाय लोँनानै बयबो मोसादोँ
जोबोद फेदोँ आरो नांलायदोँ,
खायसे बांसिन लोँनानै उन्दुदोँ
ओँखामनि आलि बेदरनि आखाय।
1457
उदां बोथोर थांनायनि उनाव उदां
दैज्लांनि उनाव दैज्लां,
आं सानबादिनो सासेमोन
सानजानिफ्राय गोर गोर फैनानै
सोनाबहा खारलांदोँमोन।
1458
अख्रां गंसे नागिरदोँ
मुलुग गंसे नागिरदोँ आं,
लैथोमा मोनसे सानस्रिनानै
उदां बार साननि सोरां।
1459
आं नोँखौ नुवाखै
नोँखौ लोगो मोनाखै आं,
स्नि साना खिन्थाया
दाइन मिथिँगाया बुङा।
1460
नोँखौनो गोसो खांनानै
बे हराव आं लेलायो,
जिउ गैयैबायदि बेसेबा
ओलैस्रो जायो आं।
1461
दाहानि जायख्लं सिङाव
आंनि जोबथा सैनायनि जिउ,
गोजोन दाहानि गेजेराव
मिजिँ बुंनाय मोकथां।
1462
बेसेबां आरो सुजुनो हायो
दाहा लानानै इयुननि रंजानाय,
गोबां गाबनि सिङावनो
दिनै थांनानै दं आं।
1463
आंनि जिउआ लैथोमा
आंनि मुङा गंसे दालां,
आंनि साजोँनो आंनि हान्थिनाय
आं थांनानै थानांगोन।
1464
औ आं जोनोम जादोँमोन
मिथिँगानि गोरबोनिफ्राय,
गुबुंले जानाय मुलुगाव
बिसोरखौ रैखा होनांगोन।
1465
आफानि नआ जिगाबमोन
उखुमा थुरि बुरैनि,
आरो गामिया जार्मान बारि
बेसेबा गिदिर अरन गेजेराव।
1466
नै गसाइ मादि माया
बेसेबा रिउआ रिउआ,
बेवहायनो सोरजिनाय
बेवहायनो आरो बायदि बायदि।
1467
गुस्लायसुलि मिथिँगाया गुस्लायदोँ
बायदि मैया सिमां,
समायना आलायारन फुंआव
बेलासियाव बायफ्लेनाय आयना।
1468
आबादानि आफानि जिउ
बोथोरा थाङो आरो फैयो,
गाबनाय आरो रंजानाय
उखैनाय आरो मोनजानायनि थाखाय।
1469
उखैयैयावनो मोनजायोब्ला
बिनि लुबैनाया बाङो,
आयनि आबु जानायनि उनाव
जाबाय आं गोखै गोदै।
1470
मिथिँगानि सिबियारि आं
जिउ जिबिनि मददगिरि,
औ थारैनो आं मावथि
मेँनाय गैयै सोलोँसा आं।
1471
आं बार जानो हानायमोनब्ला
गोजोन होनो हागौमोन,
दुलाराइ मिथिँगानि गासैखौबो
गोबाना लानो हागौमोन।
1472
हाजो गाखोबाय आं
हायेन बेरायबाय,
सिमां नुबाय आं
सिमांनि मिजिँखौ रेब्बाय।
1473
बेसेबांदि गोरोन्थि जायो आंनि
बेसेबांदि फैमाल थांखो,
सानावसो रंजाबाय आं
हराव दुखु सैबाय।
1475
आं जेसेबां उखैदोँ
नोँथाङानो बांसिनै उखैदोँ,
अब्ला नोँथाङानो जा
आं बेबादि आं बुंदोँ।
1476
आं जेसेबां लुबैदोँ
नोँथाङानो बांसिनै लुबैदोँ,
अब्ला नोँथाङानो ला
औ आं बेबादि सानदोँ।
1477
आंनि उखैनाय
आरो आंनि लुबैनायखौ,
नोँथाङानो हमथानो हायोब्ला
नोँथांखौनो आं खुलुमगोन।
1478
आं गाबबाय थानाय समाव
नोँथाङा दाद्रि होफैयोब्ला,
आं सिरि थागोन
औ बेबादिनो आं बुंदोँ।
1479
आं जेब्ला मिनिबाय थायो
नोँथाङा गुब जोफैयोब्ला,
आं सिरि थागोन
आरो आं बबा जागोन।
1480
आंनि मेगनजोँ आं नुयो
मोनसे समायना दैज्लां,
एम्फौ-एनलानि गोबां मेथाइ
आंनि गोरबोआ बुजियो।
1481
आं मेगनजोँ आं नुहरो
सोमखोर अख्रां आरो
जोँखोल-माखोल दैजोँ बुंनाय
फैलाव मोदोम गोरलै दुब्लि।
1482
गोसोआ रंजाखांदोँ खुसियाव
रंजाखांदोँ आंनि जिउआ,
सुदेम मोनाबिलि
मिथिँगा गोजोन बाराव।
1483
बे समाव हरा गैलिया
जुब जुब अखा हादोँ,
आरो आइया आंखौ फोजादोँ
लासै सिखारदोँ आं।
1484
साना फैयोब्लानो सोरां जायो
खोमसिया गावनो खारलाङो,
गोमालाङो नुयैयाव बहाबा
आरो खोमसिखौ बावगारो जोँ।
1485
आंनि साथाया जेन'बा द्राम
अखाया बाज्रुम फैदोँ,
आरो देँखो मेथाइ
फ्रि फ्रि गोदै अखानि।
1486
बे समाव आं मिनिदोँ
अब्ला आं खुसिथार,
आय आरो आफा दं
बेसेबा गान्थि खादोँ खौसेथिनि।
1487
आं सोर आं सोँलिया
आं मा जागोन-
बेखौसो सोँगोन
आंनि इयुना जोँखाङो।
1488
बेसेबा गोजोन आंनि इयुन
थेवबो आं नायहरो,
फैगासिनो दं खाथि खाथि
मिनिसुलु बाज्ल बाज्ल।
1489
मिथिँगानि मिनिस्लुनायखौ
आं गौथौयै फरायो,
नाथाय बुजिसनो हालिया
बिनि हुरा हुरा बारनायखौ।
1490
आरो खाथिसिनाव फैदोँ
अख्रांनिफ्राय रैसुमै मेथाइ,
नाथाय बारा हमथायो
बुखारना फोजावो दैसायाव।
1491
मुलुगनि बिखायाव आं
बिखा फोर्दानो थाखोमाया,
लैथोमा नांगौ जिउनि
आं बेयावनो सानस्रिगोन।
1492
अख्रांखौ रुजुनदोँ आं
आंनि गोगो खर'आव,
गासै बिफांनि रोदाफोरा
आंखौ मदद खालामो।
1493
आं मोजाङै मिथिया
जायखौ दिनैबो नुवाखै,
नाथाय आं खोनायो
बुजिनो नाजायो गावनो गाव।
1494
आंनि जिउआ खोमसिनिफ्राय फैनाय
समायना मुलुगाव,
आरोबाव आं खोमसियाव
फिन खोमसिखौ सौसिगोन।
1495
गोबां सानस्रि लिरबाय
सोलोँना मोन्दाङो,
फिन लिरो आं
गावनि बुजिनायजोँ।
1496
आं दुखुथियामोन दिनै
औ आं मिथिबाय,
जोबोद गाबदोँ आं
आंहा गोरोन्थिथारमोन।
1497
गाबोननि थाखाय आं थियारि
आंनि जिउमाया जोङो,
आंनि दाइरिनि बिलाइयाव
आं रंजादोँमोन खुसियाव।
1498
आंहा मिजिँ दंदि
सानसे आं मिनिबावगोन,
बयनिबो गोजोँ मोखांआव
आं गोसोखांगोन बुब्लिखौ।
1499
आं दुखुखौ बावनो हायोब्ला
जोबोद गोजोन जागौ,
बावनो नाजाथारो आं
रंजायै रंजायै उथ्रिनायाव।
1500
फैगोन साननि थाखाय
आरोबाव आं बोलो होगोन,
दिनै आं सोलोँदोँमोन
आरो हाजासे गोबां नाजागोन।