गोरबो इसिँनिफ्राइ -109 Poem by Ronjoy Brahma

नोँनि बे अनहाबनाय जिउखौ
नोँनि बिलिरनाय सोलेरखौ
बोहैबोदोँ मिनिसुलु मिनिसुलु
गोजोन होनानै जिबि मिथिँगाखौ
-
गोजाम फागुननि बैसागु लांगोनायाव
समायनायजोँ नायहरदोँ आर'ज गाबनानै
नै गिरि नायहर आंखौ बेसेबा खुसियाव
-
बेसेबा समायनायजोँ मोसाबायदोँ अखाया
बिरबायनाय हाद्रिफ्रा थाजिम मोन्दोँ
सोमखोर गोदान मुस्रि बिफां- लाइफांफ्रा
नै आफा सिरि मोनो आंनि बायगर गोसोआ
बोदोर रंजायो नोँनि अनसायनायाव
-
मोसाग्लाङो रैरुब बारजोँ बिफांआ
गोजोँ अखा सास्रिनायजोँ देलाइस्रियै
नोँनि देँखोजोँ आंबो रंजायो
-
गैलिया आफा आंहा दुखु मोन्नाय
नोँनि सायाव नंखाय रागा जोँनाय
रंजायो गोसोआ दिनै हान्थिनायाव
-
आंनि मिनिसुलु दावबायनायाव
बेसेबा अन्नायजोँ नोङो दैबायलांदो
बे अखानि खुदुमनायजोँ आङो लाजिसुलुदोँ
नोङो आंखौ बरायदो आफा लामायाव
गोथार मिजिँनि सोरगोआव होदो आफादखौ।
-
02/04/2015
अखानि लामायाव