जिउनि सल'/1थि थुर्खेस्वरि Poem by Ronjoy Brahma

गोदानै आलायारन ओँखारदोँ
बर'नि खोमसि अखोरांआव।
गोदान घोरोम समाज जोनोम जादोँ
गियान सारफावदोँ गोरबोआव।
*
गोदान समाजजोँ गोरोबनानै
ब्रह्म घोरोमखौ आजावदोँ सनारामा।
फाथिदोँ संसारखौ गोजोनै
गोजोन सोर्गोआरि जालांदोँ-
बेबादिनो इयुननि जोलै गालांनानै।
*
सहेन लहेन बहेनखौ
जोनोम होनायनि उनाव
जोनोम होनानै दहेनखौ
थुर्खेस्वरिया सोर्गोआव थांबाय।
*
साब्रै फिसा हौवाखौ लानानै
फुर्ण (दारिया) जोबोद सिन्था।
बिफानि जोनोम सुलमारियाव
आलो गोजोन संसार जानो लादोँमोन।
*
खाफालाव सिन्दुर फुन्नानै
जोँमा अरनि समाय लानानै
गालिखौ नैथि जुलि लाबाय दारिया।
*
मानबायस्लिँनो रोँनाय खुदिया
दहेन (सावख्ला) खौ फेदेरबाय
बिदाफोर सहेन (थबगां) लहेन (थेफा) मोना।
मोसौ गायखेर दौनानै
ओँखाम मायदि सिफ्लेनानै।
*
आमटेकायाव गोदानै हादान खुलिबाय
बयबो खारलांदोँ-
आयजेँ आयला लानानै।
मोसौ बोरमा होलाङै होलाङै।
*
आबाद मावनो मेगन जोलै
रंजानो मोसानो हारिमुनि आगजु
घोरोमखौ गोबाना लानानै
इयुन जोलैखौ लानानै।
*
बेसेबा फैलाव अरन आमटेका
जिबि जुनार दाउसिन दाउला
सोमखोर बेसेबांबा गिदिर अरन
बेयो गंगार हाजोनि आफांआव।
*
दाब दाब जायगानि बयबो
आबाद मावग्रा आबादारिफोर
हादान फाथि फाथि थाफैबाय।
संसार जानो जुजिबाय।
*
बिजिनि रायजो गवालफारा
कक्राझार बाङाइ गसाइगामिनिफ्राय
मायबां सोनाब बंगनि
बेयाव समाज दानो लाबाय।
*
गसाइगामिनिफ्राय फैनानै
गथ' गथाय बिसि फिसाय
दारिया सालगुरि गामियाव थाफैबाय
जोबोद खष्टयै संसार जुरिबाय।
*
बोसोर गोदान फैयो
बोथोर गोजामा थांबाय।
बेबादिनो बैसोआ थाङो
मिथिँगाया गोदान गोदान फैयो।
*
गालिनि गोरबोनि जोनोम जाबाय
निजन मेर्गा कमला
मिदि गद' बाजाय
जोनोम जाबाय उन्दैसिन साल्थाबा।
*
साब्रै हौवा आरो साथाम हिनजाव
साफानि उनाव साफायै
फेदेरै फेदेरै फेदेरबोबाय।
*
मोसौ गायखेर फुदुंनानै दौनांबाय
बै नखर बै नखर-
मोसौ गायखेर नागिरनांबाय।
ओँखाम मायदि सिफ्लेनानै दौनांबाय।
*
थेफाया लथा लानानै
थाबाय थाबायै गायखेर नागिरबाय
थुर्खेस्वरिनि फिसाफोरा
जोबोद खष्ट मोनबाय।
*
लासै लासै बयबो देरबोबाय
बयबो फरायसालियाव थांबाय
उनाव बयबो फरायनायखौ गारबाय।
थाखोसे थाखोनै थाखोथामसिम फरायबाय।