गोर्बोनि गांसे आर'नाय; प्रनितानिसिम Poem by Bidindra Basumatary

गोर्बो इसिंनि दाहाखौ दान्दिसे नङा,
इयुन समसिमबो बुंनांगोन;
नोंनि रोंगौथियाव-
बर'नि दाहा,
एसेब्लाबो गोमाबाय,
नों बावगारहोबाय बर'नि दाहाखौ।
गोर्बो इसिंआव गोग्गानाय लाना
साफ्रोम बर' फिसायानो मिनिस्लुदों;
बयबो बुंसोलायदों-मा एसे मोजां!
आंबो बुंगोन आरो बुंआ लासिनो थानो हाखाया,
जेराव नोंनि मोसानाया बयजोंबो अनसायजादों।
नों आगोमा फिसा-बाउलुरि बर' बिमानि,
आवथासे बर' हारिनि।
जारिमिना नोंनि अराय गोथां (थैनो रोङै? ,
नोंनि जारिमिनजों दं बर' माहारि।
बेबादि जारिमिन सोरजिनायाव
गैया आंहा गथाइनो नोंनो,
जेबो होथावना मुवा;
अब्लाबो आं गथाइबाय नोंनो-
आनि गोर्बोजों
गोर्बो इसिंनि गांसे आरनाय।
नाथाइ हायाखै मोखथां बिखाव
गथाइदोंब्लाबो नैबे खन्थाइजोंसो,
नाजावना लादो बेखौनो अनसायना।
आरो आं बुंगोन-
नों अराय देरहासार जालांथों!
मुलुग अख्रांनि जारिमिनाव-
नोंनि मुंजों लोगोसे
थालांथों बर' मुं अराय जोंलारि जाना।