बाङाइगामि लजिँनिफ्राय: आयनि देरा, आंनि गामिसिम Poem by Ronjoy Brahma

बाङाइगामि लजिँनिफ्राय: आयनि देरा, आंनि गामिसिम

गोबाव सान, गोलाव सान हर
बाङाइगामिनि लजिँआव दंमोन आं,
बन्दरनि आर सि सि बिल्दीँआव
सिलिँ पेननि बारजोँ नाख्रेबजानानै।
आं आंगायनाय मोन्दोँ
बन्दरनि डिजेल-प्रेटल खामनाय गेष,
आंहा बानाय फैदोँ
सहरनि रलार हुनाय लामायाव
गोजोन्नाय गैयै मिथिँगा सिबिनो।
फुंआव फिरिसे हानाय अखाया
आंखौ गोजोन होदोँमोन,
नाथाय बेलासिनि बारखौ
सोर लाबोगोन सोलेराव?
नांगौ गोदान सावगारि
नांगौ गोदान देँखो खबाम।
बेलासि बेलासि बन्दरनि जेवरा बारना
आयनि देरा होन्ना आगान होयो,
बेयाव दंमोन मोनसे गोदान रंजानाय
गामिनि आफाद फोथारा
साया माया समायना
आंखौ बरायदोँमोन मिनिसुलु मिनिसुलु।
आखाय बिलिरबानो खारनाय
साखा खबब्रै फिसा गंसे मटरा
आंखौ गोबाना फैयो न' होन्नानै,
आं जोबोद गोजोन्नायजोँ खेबसे मिनिदोँमोन।
मटरनि गोरबोआव एब्रेनानै
बिनि खोमा फाइलि आयनायाव
मिनिसुलु मोखां आंनि-
आंनो आं जोबोद खुसि नुदोँमोन।
सिउ सिउ बार
खोलो खोलो बारा
आंनि बिखायाव गोबा फैदोँ
अहानाय गैयै बिसोर आंखौ बिलिरदोँमोन।
फिनज्राब फिनज्राब दालां
आर सि सि बिल्दीँ
बन्दरनि मोनामनाय ड्रेनखौ
फिसा उन्दै मटरा गारबोदोँमोन।
जोबोद समायना जोबोद मुहिनां
सोमखोर सोमखोर आफाद दुब्लिखौ
सिउ सिउ खारनाय मटरनिफ्राय
आं नायहरदोँमोन मेसेबनाय गैयै।
लामानि जाबथु जाबथु थायलाद' बिफां
गंस्रि गंस्रि सोमखोर बैग्रि बिफांफोरा
आंखौ सिगां फारसे नायहरदोँमोन,
बिसोरखौ गोसोजोँ गोसो आखाय सोमावहरदोँ आं
नायहरै नायहरै उन फारसे।
आय' मा इसे समायना!
नैबे मिथिँगाया,
दैज्लांनि नैबे आफाद दुब्लिया!
बादोरनि अखाजोँ सोमखोर समायना।
गोसोजोँ गोसोनो खन्थाइ आवरायदोँ
लिरनोबो नाजादोँ गोरबो बिलाइयाव।
सिउ सिउ गोख्रैयै सिमब्रानाय
गोख्रैनिफ्राय गोख्रैसिन खारनायाव
फारलंसे फारलंसे गोलाव लामा
गोबां बिफां लाइफांखौ गारबोदोँ,
गोजोन गोजोन बारआ
आंखौ लोगोआव लादोँमोन।
आय' हाबाब मा इसे समायना!
फैलाव मायनि गोथां दुब्लियाव
गुफुर फालोसे दाउब'नि फालो
दब्लायनै दब्लायथाम आवग्रिना
बिसोरो मेल सावरायलायदोँ
नुहरै आं ख्रब ख्रब आफा खबहरदोँ।
गोजौ गोजौ खुन्थियानि
आर्टिँ सोँनाइ थारआव
जरासे दाउस्रिनि एल्बामआ
आंखौ मिनिसुलु होदोँमोन
आं रिउ रिउ गोजानसिम नायहरदोँ।
गोसोआव मेथाइ अनजालि रैसुमैनि,
गोरबोआव खन्थाइ आयनि,
आर'ज गाबदोँमोन आं सिरि सिरि
सोरजिगिरि परम ब्रह्मनिसिम
मिथिँगाखौ सिबिनो जुगे जुगे।
अनसुलि गोरबोनि मेंरोङै
फिसा उन्दै मटरआ
आमटेका गलायाव आंखौ एंख्लायो,
गोरबोजोँ खेबसे साबायखर होदोँ आं।
दखना फास्रा जोमनानै
गामसा लेन्सा खिथेबनानै
आबै-आबौमोननि मैगं फान्नाय,
साथा खेँखाय एथेबनानै
मना जलंगा लानानै
खुमब्रा जोगोनार मैगं बायनाय
मान्डे सिब्रु मैगं बायनाय
आदै बुदां मादै बालेँमोनखौ
मिनि हाला हाला आं नुदोँ।
आबै आनायसिनि फिथा गलाजोँ
आरोबाव आनै थिख्रिनि सिथाव गलाजोँ
खेबसे गिदिँना थांदोँ आं-
नाथाय आबै आनैनि गामलायाव
फिथा सिथाव गैलिया।
बेलासि बेलासि फियाजि फक'रि
गोसो खुसि थरफा थरफा जानानै
गामि मोनफैनाय लामाजोँ
मेथाइ रोजाब फैयो आं।
हाबाब! हाबाब! समायना
मा इसे समायना नैबे बुब्लिया
गोरबोआव खन्थाइ आवरायो-
सोरगिदिँ जेरैबो माय दुब्लि
सोमखोर समायना बारजोँ
लासै लासै स्राय स्राय मोसादोँ;
बेसेबा गुवार उदां अख्रांबादि
सालाङि मायनि दुब्लि।
सोनाबहा मोनाबिलिया फैगौ
खानाय हसारनानै,
जारौ अनजालि साना
मिनिसुलु मिनिसुलु आखाय सोमावहरदोँ।
जोबोद समायना मायनि दुब्लि गेजेर
लिँ लिँ लामायाव गसंना
जोबोद रंजालु आं नायहरदोँ,
फालोसे हांसो सिलारि
आरोबाव दाउस्रि फालोसेया
जारौ साननि फारसे बिरलांदोँ।
लासै लासै थाबायै थाबायै
आं आंनि गामिखौ मोनफैयो,
सानफामानि सानबोलावरियाव गोदो हाबनाय
अब्लाबो आं मेंङाखै सानस्रिनो,
सारि सारि गय खान्थाल थाइजौ
मिथिँगानि गेजेराव जोँनि बारि,
आय'! गलि, गग्रा मायहुं लारि लारि,
बेनो आंनि आंगो गामि
जेराव सानसे दंमोन आजै- आजौ।
सानफा सिला बाजोखौ गिनानै
गावनि आनज्रो देरायाव एब्रेनानै,
दासो सम मोन्दोँ जरासे दाउलुरा
मोनाबिलि मोनाबिलि मैथ्रु फिथाइ खेबख्लाबनो
जारौ गोमोन मोदोमफ्रु मोदोमफ्रु।
दान्दिसे नायगोमो हाबदोँ आं
आरोबाव बारिनि थालिर गोमोनखौ
ससे लामानि दिन्दां दिन्दां गोबां
जुमब्रा फिथाइखौ।
सिलाजोँ हाबजेन्नाय लामाखौ मोनो
गोजाम जोँनि देराया,
माराम खाफबनाय थिँ उखुम
खानस्रि ससमा उरनाय उसुं
थेवबो थेवबो आं गोजोन्दोँ
उसुं खनायाव बारनाय गुफुर
गेवलां गेवथां दाउदै बिबार नुना।
बेसे गोथार बे बिबारा
बेरे सिखिरिया लाजियो,
मानोना बिसोरहा दाय दं
बे बिबारनि बिदै बिसोर सोबा।
आगानसे आगाननै आगानथाम
लासै लासै थाबायब्ला
आफानि राव खोनायो उनथिँ-
बियो मोसौ हालुवा मानै
गाय मोसौ मानैखौ लाबोबाय,
नायहरो आरो सिला फारसे आगान होयो।
आंनि गोजाम सेन्डेलनि गाबनाया
सैमा थनिनि उन्दुनायखौ फोजायो
बियो सिरि मोनो,
आंनि फारसे गोर गोर खारबोयो;
बियो बाज्ल' बाज्ल' खुसिनि गाबो
गावनि थोँनै आखायखौ थिखोयो
आंनि आखायाव होयो,
आं बिलिर बिलिर बुरखायो
नाथाय आं दुखु खालामदोँ
आं बिनो मेथाइ लाबोनो हायाखै!
सिलायाव थं गसंना नायो
सोरगिदिँ न'नि खेबसे;
संग्रा इसिँनिफ्राय गुफुं गुफुर मावजिया
आंखौ मुसुगुर बोखोना नायदोँमोन
खेबसे बियो मेववव होन्दोँमोन,
आं गाबनो ओँखारदोँ खुसिनि।
आं जोबोद खुसि नैबे मोनाबिलियाव
खोलो खोलो बार बारदोँ
गय फाथै बिलाइफोरा मोसादोँमोन,
आयआ बारि खनानिफ्राय
खेरखा, मैगं खादा लाना फैदोँ
मिनिसुलु बियो आंखौ नायदोँ,
आयआ आंखौ रायदावफैदोँमोन-
स'फैबाय फिसा? ? ?
22/08/2015

Saturday, August 22, 2015
Topic(s) of this poem: journey
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success