उन्दुनायखौसो फोजायो हानाय अखाया Poem by Ronjoy Brahma

उन्दुनायखौसो फोजायो हानाय अखाया
मानोना अखाया फोजामेथाइ मिलौहाब रोजाबो,
जाब्लाबो जाख'नो हायै कार्बन-डाइ अक्साइड बिफांनि थाखाय
थैनाय आरो थैफ्रामनाय लाइफांफोराबो बाज्लफिनो।
जुब जुब अखा हानायनि सान ओँथियानो
मिथिँगानि रंजालि गेवलां बोथोर सफैनाय,
ओँखामनि हाजोआ गसंफैयो अखानिफ्राइ
बिफांनि दालायाव फिथाइफोरा मोसायो।
दाउसिनफोरनि मेथाइखौ आरो बेसे खोनासंनो?
खन्थाइगिरि रेबगना मोजां मोन्नायनि गुथालाव गोबाख्रबो,
खुसियै जोमैया हाथर्खि अखाफोरखौ आसि थुनानै दिन्थिहरो
जेब्ला अखाया मोसाना दान्दिसे जिरायो।
आंनि गोसोनि लांदां देरायाव आरोबाव
सानस्रिया जोमग्रा दखनाजोँ बागुरुम्बा मोसायो,
गोरबो फुंखाया हिरानि महर लागोन
बिदै बोहैनाय आबुं जिउनि बाख्रियाव।
अख्रांनि मेथायावनो दैसाया बोहैयो
गोरान दुब्लि दुब्रिनि मोदैखौ सोबखनानै
हरफाथार्ला निनजोँ दावहा नांग्रा जावलिया सिमांआ
गोमालाङो अखानि खबाम रोजाबनायजोँ।
गुथालखौनो जिउनि साघना खालामनानै
सोमावसारनायानो लैथोमानि बोगदाद आखु,
आयनि मोखांनिफ्राइ ओँखारबोगोन जारौ साना
नै अखा बिबार बारहोबाय नोँ मेगनाव।