ददेरे Poem by Ronjoy Brahma

जारौरौ दखनाजोँ समायना
हाबाब सना दाउ मैना
खुदुमथाव, बामथाव- गोसोथोथाव।
ऐ ददेरे! बहानि नोँ सना?
इसेबां रूप गोनां हायना?
आं नोँखौ सिनाया
थं गुमुर जेबो मिथिया।
बबेनिफ्राय फैनाय नोँ सना?
मिँमांनि ना सिलाफोथारनि?
ना गोदान बड'लेण्डनि
मान्दारगुरिनि सोना मैनागुरिनि जाखो?
वार्ड नाम्बार फाइभनि ना आमटेकानि?
आय' हाबाब मा महर नोँनि?
बिबारि गावदां थमेन्नाय
माब्लाबा आं नुनायबादि बड'फा नोगोराव।
नोँ सोरनि थाखाय सना?
किट्सनि ना इसाननि?
ना लाहारि बिक्रममोननि
गोगो खन्थाइयाव जिउ मोननाय लाइमोननि?
बुंनो सानो आं रुपनाथनि रावै-
हाबाब सना, हाबाब मैना
हाबाब आंनि जिउ।
नोँ सोरनिबा सैनाय?
हास्थायनाया जागोन आंनि इनाय?
नोँखौ नुब्लानो गोजोन आंहा
बिलिरो सिउ सिउ बारआ।
आय' ददेरे आंनि सैनाय
बहानि जाखो नोङो बुंनाय
फर्बज'रानि ना सामथाइबारिनि?
लांहिन पदुमफुख्रिनि?
ना बिरहांगामिनि?
रौता सारियालिनि ना
कक्राझार थिनालिनिसो सना?
माब्लाबा मेगना नुबाय नुबाय
बड'लेण्डनि दर्खँ साफागुरियाव
एबा बाकसा तु कक्राझार बड'लेण्ड ट्रेन्सपर्डआव।
नोँनि जानजि बालेँ-लेँ
मोसाहां मोसाहां सावगारिया
नुबाय नुबाय मोनो आं
आब' जिरि, संगिनामोनजोँसो?
ना ग्रेटार बंङाइगाव स्टुडेन्स मिटनि
बागुरुम्बा मोसानायावसो..?
बिखायाव बिजाब गोबाथुमना
मुसुलफुरनि इउ. एन एकाडेमियाव
नोँबो थाङामोन नामा?
नोँखौ आं नुनायबादि
जिथि कमल कुमार ब्रह्म
देरहासादनि बान्था रान्नायाव।
ना आङो माब्लाबासो
बर'-बांगाल सुनामिनि रिलिप् केमाव
एबा सावथाल दावराव जाब्ला
बबेवबा नुवामोन नामा?
दैखरगुरियाव नांगोल जांख्रानि हाब्रु सारलायब्ला
नोँ थारैनो गैयामोनथ'..?
ना आङो मोखां बिजाबावसो
मैया दाखालिफोर नुवामोन नामा?
नोँनो नङाना सना
सितानाथनि 'सिमांनि सैनाय'?
ना नोङो इसाननि 'मोनाबिलि'सो?
हाबाब जिउनि मायनाव सना
ददेरे आंनि दाउ मैना
नोँखौ आं नुबाय नुबायबादि
गोजोनफुरिजोँ फालसार सालायलांब्ला
नाथाय नोँ... नङा नङा।
नोँनि थं गुमुर आं मिथिया
काग्राबारिनि लामायाव खेबसे
नारेँ खाजि जाब्ला नोँबो गैयामोन्थ'?
नोङो बारसे गलाब बिबार सना
मुङा जेरै ददेरे, जान्जि सेरेरे
खन्थाइखौनो सना आं लिरनोसै
नोँजोँ आंनि जुलि जाथोँसै।